Saladin: Kita loonsubsidie mei mei di luna tabata baño di awa friu

ORANJESTAD – Un baño di awa friu, ta loke Francis Saladin, Vice Presidente di Comerciantenan Uni Aruba (CUA) ta yama e kitamento di loonsubsidie mei mei di luna. Asina e la bisa den e edicion special di e programa Noticiacla LIVE cu a pasa diahuebs mainta envez di e orario regular di anochi. Segun Saladin, ningun momento nan (y ningun otro gremio comercial) tabata na altura di esaki y como tal tur a wordo gara di sorpresa. Esaki mientras cu CUA tabatin un proposicion pa gobierno (lesa: minister Glenbert Croes e tempo ey), con pa anda cu FASE di un miho forma. Pero nunca nan no a haya un reaccion formal di gobierno, cu ta algo cu nan ta lamenta. Y awor, diripiente, sin anticipacion, ta anuncia cu ‘forza retroactivo’, ta para FASE y Loonsubsidie.

CONSECUENCIA

Segun Saladin, esaki por tin consecuencia serio pa hopi comerciante, debi cu nan no a planea riba esaki. Hopi ta conta riba e subsidio, cu ta pone cu a planea pa paga cierto cantidad di trahado pero cu diripiente no tin placa pa esey awor. A papia cu SVB si y aki ta trahando riba algo. Pero e forma di traha, no ta corecto segun Saladin. 

SINTA RIBA STUL DI GOBIERNO

E echo cu hopi biaha gobierno ta tilde comerciantenan di kier sinta riba nan stul, tampoco ta corecto segun Saladin. “Nos no ta interesa pa sinta den bo stul. Nos ta interesa pa coopera y yudabo den bo stul” Saladin a sigui bisa. Pues e asunto ey no ta un grito cu ta corecto segun Saladin.