Sindicatonan ta duna gobierno un siman pa cumpli cu nan exigencianan

ORANJESTAD – Sindicatonan ta duna gobierno di Aruba un siman di tempo pa haya un contesta positivo, esta di elimina e recorte salarial di 12.6%. Asina presidente di sindicato FTA Hose Figaroa a bisa na e grupo di miembronan di e 12 sindicatonan cu a presenta na stadion Frans Figaroa diaranson atardi laat.  E fecha pues pa gobierno cumpli, ta dia 2 di december proximo. Pa loke ta sindicato SIMAR, su presidente Josephine Albertus a bisa cu e causa tin dos parti pa e sindicato, unda cu ta bringando pa para e cortamento di 11 miyon florin, y di otro banda, para e recorte di 12.6%. E intencion ta pa entrega e manifiesto cu e exigencianan despues di un marcha di e sindicatonan cu ta cuminsa diahuebs atardi despues cu tur uni na Juliana School pa despues bay Bestuurskantoor.