Curso pa detecta documento falso

ORANJESTAD - Koninklijke Marechaussee ta ofrece un curso con pa reconoce documentonan falso, incluyendo paspoort y otro documentonan importante, na autoridadnan encarga cu proteccion di frontera na tur pais di Reino Hulandes. E curso ofreci pa Marechaussee ta encera hopi informacion basico esencial, pero ta specialmente dirigi na reconoce documentonan hopi uza na Europa, cu en realidad na Aruba y entre nos bishitantenan no ta e documentonan di identificacion mas comun uza den nos region.

Anteriormente, na diferente ocasion, Marechaussee a duna e curso na Aruba. Aña pasa a dicidi hunto cu Academia di Husticia di Aruba (Scol pa Polis Edgar Vos) pa rediseña e curso, adapta esaki pa nos situacion y e situacion den nos region, dun’e su mesun nomber y cab’e cu un curso “train the trainer”. E proyecto aki, cu a cuminsa for di november 2013 cu e prome reunion, sigui pa e diferente fasenan di planning y training, a conoce su culminacion siman pasa.

Durante di un ceremonia special a entrega e certificacion di trainernan cu ta capacita y certifica pa duna e training cu a haya e nomber CARDOC1. A uza como base e materialnan di e curso cu ta wordo duna pa Marechaussee y a añadi tur e informacion y documentonan necesario pa haci di e curso aki uno cu ta cumpli cu tur exigencia di e curso original, pero adapta pa e necesidadnan di nos region. Na e proceso aki a participa trahadonan di Gabinete di Gobernador, Censo, DIMAS, Cuerpo Policial, Luchthavenpolitie y IASA (Inmigracion) y tur e participantenan aki a wordo certifica como trainer pa CARDOC1. Academia di Husticia di Aruba ta e unico centro di entrenamento certifica pa Koninklijke Marechaussee pa organisa y ofrece e curso aki.

Comisario Irma Gordon ta hefe di “Bijzondere Diensten” y awo tambe ta certifica pa duna e curso aki. El a splica cu prome cu tur cos e trainernan mes a sigui e curso basico Hulandes y despues nan mes a participa na e proceso pa pone e curso hunto, a wordo certifica como trainer y awo ta cla pa duna e curso aki internacionalmente. Ya a bin un peticion for di Corsou, via di Marechaussee, pa organisa un curso pa instancianan di e isla ruman, director di Academia di Husticia, Jeannette Richardson-Baars a bisa, y ta evaluando pa cuminsa un curso tambe pa den e proximo lunanan pa instancianan na Aruba mes.

Ta importante pa tur a instancianan envolvi traha hunto pa hisa e calidad di servicio cu ta encarga cu control di nos frontera. Dos empleado di inmigracion tambe a wordo certifica. E sistema “Radex” cu ta wordo uza pa registra entrada y salida di personanan pa y for di Aruba no ta detecta documentonan falso y ta importante pa e personal mes por identifica documentonan falso basa riba nan conocemento.

Aruba awor por ofrece e curso na e autoridadnan na e diferente islanan cu ta forma parti di Reino Hulandes. E curso a wordo “Arubianisa” y por wordo expande mas tambe. Colaboracion ta e palabra clave den e proceso pa e realisa e proyecto aki, el a añadi. Via e programa ‘train the trainer’, organisa pa prome biaha den Caribe, e producto awor ta Arubianisa. Esey kiermen tambe cu den futuro, peticionnan for di Corsou of Sint Maarten of for di Aruba mes for di servicionan externo, esta Duana y Kustwacht, Vreemdelingendienst, cu kier un curso tocante documento, cu Aruba mes por duna esaki, en bes cu Marechaussee tin cu bin for di Hulanda pa duna e curso. Esaki ta mas eficiente y esaki ta miho na termino largo. Mr. Jeannette Richardson-Baars a subraya cu Scol di Polis di Aruba tin un producto unico den nos region, cu ta refleha e situacion y trafico entre e islanan y entre e islanan y otro paisnan. Esaki ta algo pa ta orguyoso di dje, cu Aruba a gana e confiansa di Koninklijke Marechaussee y cu despues di vakantie grandi lo cuminsa cu e prome curso di CARDOC1 na Academia di Husticia di Aruba. Aruba a wordo scogi pasobra e grupo envolvi, coordina pa Academia di Husticia a demostra flexibilidad y boluntad pa apoya ideanan cu ta bon y traha duro pa haci’e un bon producto, Richardson-Baars a conclui  bisando.