Aruba a tene Conferencia 35 Aña Status Aparte, Aruba Ta Di Nos Tur

ORANJESTAD – Diamars 23 di november a tuma luga e Conferencia 35 aña Status Aparte, Aruba ta di nos tur. E conferencia a conta cu presencia di Gobernador y ex Gobernador, Ministernan, Parlamentarionan, Presidente di Parlamento y diferente ex politico y personanan cu tabatin un rol importante den e 35 aña cu Aruba tin Status Aparte. Durante apertura di e conferencia, Prome Minister Evelyn Wever- Croes a enfoca riba e lucha cu a conduci na e logro di Status Aparte, riba loke cu no a logra ainda y e futuro di Aruba.Un palabra pa tipifica e lucha cu a Aruba a hiba 35 aña pasa pa por a drenta den e fase nobo como pais autonomo ta: union. Union den amor pa nos pais, y union den amor pa su simbolonan di identidad, nos himno, nos bandera, nos moneda y nos escudo, Premier Wever – Croes a splica. 

Fuera di e discurso, tabatin varios panelista cu a delibera riba e tema en cuestion, sigui pa e parti musical y arte, unda cu por a disfruta di baile y tambe canto di artistanan manera Edjean Semeleer y Jossy Brokke, y e guitarista Chris Kross.