Ex minister kier Parlamento haci ‘feitenonderzoek’ riba Dump y Imsan

ORANJESTAD – Ex minister y actual lider di su propio partido UPP, Booshi Wever ta pidi pa Parlamento haci un ‘feitenonderzoek’ of ‘forensisch onderzoek’ den asunto di Dump y IMSAN. Esaki Wever ta pidi den un carta awe, y e ta sugeri pa esaki wordo haci den forma di un mocion. E ex minister cu tabata responsabel pa tanto Dump como IMSAN, ta bisa di ta ‘harta’ di tur insinuacion den Parlamento, y tambe di ministernan manera Sevinger, cu ta acuse ‘ a todo placer’. E ta culpa e presidente di Parlamento Marisol Lopez tambe di ta permiti tur esaki den Parlamento.

DEFENDE SU MES

E problema cu Wever tin ta, cu ta haci tur esaki sin dune un chens di por defende su mes ‘ à la minute y ter plaatse’. “Mi no tin nada di sconde! Mi consenshi ta limpi! E "feitenonderzoek” of ‘forensischonderzoek" den cada proyecto lo demostra cu no tin nada cu a bay robez” Wever ta sigura den un carta cu e la manda pa Parlamento. Lesa e carta/comunicado completo aki. E foto di archivo ta di e ultimo candela na dump na Parkietenbos.