Botica di Servicio a otorga check grandi na Fundacion Diabetis Aruba

ORANJESTAD – Awe mainta Botica di Servicio (BDS) a entrega un check grandi di 10 mil florin na Fundacion Diabetis Aruba. Franz Sydow Ass Managing Director di BDS a haci e entrega aki na srta Charlene Leslie,  Proyect Coordinator di Fundacion Diabetis Aruba (FDA). E suma ta loke cu Botica di Servicio a logra colecta di e ultimo evento Deportivo cu nan a tene esta e Diabetis Walk & Run recientemente. E placa ricibi, lo wordo usa pa e Diabetis Prevention Program segun srta Leslie a splica. 

E PROGRAMA

Segun srta Leslie, for di 2019 ta trahando riba e programa PRISMA, cu ta enfoca riba e maneho di diabetis tipo 2. Tur esnan cu tin e malesa aki, por participa den e programa menciona. Covid19 a para e operacion un poco pero ya awor na 2021 a restart e programa, cu e sosten di PAHO. PRISMA lo bin cu e parti di e prevencion otro aña, unda cu lo delinia exactamente ken ta e target y con ta ofrece e servicio. “Pero nos ta gradici Botica di Servicio inmensamente pa e bunita Diabetis Walk & Run, nan di 4 edicion unda cu por a lanta e cantidad di placa pa por a cuminsa cu e proyecto ey otro aña. Segun sr Sydow, e proyecto ta hopi cerca di cas, mirando cu su welo tabatin diabetis tipo 2 y e malesa a complica su estilo di bida. “Mi kier purba di por yuda unda cu por pa asina nos preveni esaki” sr Sydow a sigui bisa. A splica cu a cuminsa prepara pa e di 5 edicion di e Diabetis Walk & Run.