HOH revisando plan pa escala y de-escala pa posible aumento di caso di Covid19

ORANJESTAD – Hospital Horacio Oduber e siman aki ta revisando su plannan pa tanto escala como de escala su servicionan medico relaciona cu Covid19. Asina e director Jacco Vroegop a confirma na e portal aki, basa riba un documento cu e portal aki tin di e Outbreak Management Team (OMT). E motibo pa revisa e plan ta e aumento di casonan di Covid19 cu por spera proximamente. Debi na e dianan di fiesta, y aumento di biahe for di destinacionan unda Covid19 a aumenta, no ta descarta un aumento den casonan di Covid19. Y cu hospital den pleno reconstruccion, y e edificio ‘bieu’ fuera di servicio, ta nifica cu tin menos capacidad di cama, compara cu e ultimo olanan di Covid19. Mas specifico, cu tin 36 cama menos disponible. Den cuadro di esaki, ta premira cu lo mester haci uso di e ayudo leve di hospitalnan di Colombia pa trece alivio na e cuido medico local.