Sarah-Quita Offringa ta gana titulo # 18 y 19 mundial di Windsurf!

AMSTERDAM – E siman aki a bira sigur cu e atleta professional di deporte di windsurf, Sarah-Quita Offringa, a logra su di 18 y 19 titulo mundial riba e deporte aki pa damas. Un logro sigur enorme pa tanto Sarah Quita como Aruba. “Ta prome biaha den casi 2 aña cu nos tin un final, cu a haci un tour. Lastimamente tabatin dos competencia so, uno na Israel uno na Francia” Sarah-Quita a cuminsa bisa noticiacla diasabra. “Esun na Israel mi a gana e slalom, pero na Francia no tabatin suficiente biento pa caba e competencia di slalom. E ora overall e puntonan di Israel ta score, y pesey mi a gana e titulo (internacional) di slalom atrobe”, Aruba su orguyo di windsurf a sigui bisa. Esak ta bira e titulo number 5 cu e ta gana mundialmente den e disciplina di Slalom. Loke ta interesante ta cu pa e parti masculino, tambe e premio mundial a cay pa Caribe, specificamente Bonaire unda cu Amado Vrieswijk a gana esaki pa e isla di Flamingo. 

FREESTYLE

Den freestyle si nan a logra competi na Francia. “Eynan tambe mi a sali na prome lugar!” Offringa a bisa emocionalmente. Esey ta bira su titulo number 13 cu e ta gana den Freestyle mundialmente. “Mi ta hopi contento cu nos por a competi atrobe. Mi ta spera cu pa otro aña, nos bay tin mas competencia” Sarah Quita a sigui bisa. Mientrastanto e la cuminsa cu su biahe bek pa Aruba. Y pa loke e ta bay haci awor na Aruba? “Pasa tempo cu famia, y depende con Covid19 bay, mi ta spera cu pa januari mi por sali y biaha atrobe”. Y como su mensahe final, Sarah Quita a bisa “Danki pa tur e apoyo cu mi ta haya di e Arubianonan!”.