Ministernan precupa cu lekmento di documento den prensa

ORANJESTAD – E hecho cu den menos cu un siman, no menos cu dos minister ta wordo confronta cu e hecho cu documentonan confidencial di nan ministerio ta leak, tin sigur e dos ministernan aki precupa. Tanto minister Michelle Hooyboer Winklaar como Alex Schwengle a bira ‘victima’ di leakmento di documentonan, cu a ‘aparece’ den prensa despues. Un otro minister a bay asina lew (Paul Croes) di hiba un medio di comunicacion corte e siman aki pa motibo cu documentonan 'confidencial' a leak y cay den man di prensa. Mientras cu un minister a keda sorprendi y ta precupa, e otro su precupacion tabata mas grandi y a rabia di tal forma cu e la manda su staff completo cas te proximo aviso. Cada un a reacciona diferente pero ta precupa seriamente cu e acto aki. Di otro banda, no ta nada nobo cu cosnan asina ta sosode, ya cu ta ‘custumber’ cu documentonan diripiente ta aparece den ‘box’ di un of otro medio di prensa.

HOOYBOER

E caso di minister Hooyboer ta trata e carta na SKOA, cu a keda publica den un otro medio recientemente. “Den e caso particular aki, no tin un issue pa comparti e informacion aki, pasobra no tin nada di sconde” Hooyboer a bisa NoticiaCla.com. De hecho, segun e mandatario, e ta demonstra cu e ta trahando pa resolve e asunto di SKOA. “Pero esey no ta excusa e hecho cu ‘leak’ documentonan cu meta politico mester wordo condena” e mandatario a sigui bisa. Mayan e por ta un memo confidencial di seguridad nacional cu ta lek. E mandatario mientrastanto ta sigura NoticiaCla cu e carta no a lek for di su oficina, sino otro caminda. E ta mustra e diferencia entre e documento original y e documento cu a keda publica pa mustra cu claramente tin un diferencia.

SCHWENGLE

Den e caso di e otro minister, den e caso aki Alex Schwengle, esey a bay un poco mas lew unda cu e mandatario a haya sa cu un documento tambe lo a leak y cu esaki lo posiblemente a sali for di su oficina. Manera cu NoticiaCla.com a raporta den forma di primicia, e caso aki a pone cu e mandatario en cuestion a rabia asina hopi cu e la manda tur su personal cas te proximo aviso y cu ora cu e bolbe, e lo dicidi ki paso e ta tuma. E la mientrastanto subi avion y biaha pa Panama pa atende un congreso medico. NoticiaCla.com a compronde cu e staff lo ta kedando cas te mitar di e siman aki y cu pa mas tarda diahuebs e mandatario lo mester ta bek na oficina. No ta conoci si su staf lo bolbe e ora ey tambe of no.

MIHO CONTROL

Hecho ta cu e ministernan ta hopi precupa cu e situacion di seguridad di documento y ta purbando pa wak con por controla esaki di un miho forma. Di otro banda, manera indica previamente, ta conoci cu no ta un novedad cu esaki ta sosode y cu ta un practica casi ‘normal’ cu documentonan ta sali di un oficina di gobierno. Hopi biaha ta trata di un persona di un partido contrario, cu por ta no ta contento, cu ta uza e ‘hecho’ aki como represaya. E la pasa den tur gobierno y ta un risico cu gobiernonan ta sinta cune semper.