Encuesta: Union familiar y kerstboom ta lo mas importante durante Pasco di Nacemento

ORANJESTAD – Den un ‘mini encuesta’ di Noticiacla riba patronchi di celebracion di Pasco di Nacemento, esnan encuesta ta mustra cu lo mas importante durante Pasco di Nacemento ta pa pasa tempo cu famia, sigui pa e cena navideño. Mayoria (56%) ta ta kere cu tin un kerstboom ta hopi importante durante periodo aki. Di otro banda, un grupo grandi di esnan encuesta (56%) ta confirma cu Covid19 a pone nan celebra pasco diferente. Y mayoria di esnan cu a participa, no ta bay Misa di Aurora (69%). Un total di 405 persona a participa, di cual e grupo mas grandi tabata muher. 

RESULTADO

Loke a hala atencion ta cu entre esnan cu a participa den e encuesta, mientras cu mayoria (79%) a bisa di ta celebra Pasco, tin un grupo di 9% cu no ta celebra pasco, y un otro grupo poco mas grandi (12%) ta bisa cu ta depende di e situacion. Mientras cu ultimo añanan varios radio y television ta cuminsa for di October y November cu celebracion di pasco pa medio di programanan navideño, e mayoria den e encuesta (52%) ta cuminsa decora te na December. E grupo mas chikito (10%) ta decora na october y e otro ta na November.

COVID

Manera a raporta, mayoria cu a bisa cu Covid19 a afecta nan celebracion di Pasco, nan ta bisa tambe (di e opcionan brinda) kico asina nan ta haci diferente. Loke mas a resalta ta cu 49% ta bisa di debi na e pandemia, nan ta gasta menos placa na cosnan di Pasco, manera decoracion, y cuminda. Un grupo chikito di 4% ta bisa cu a stop di celebra pasco debi na e pandemia. 

KERSTBOOM

Aki tambe tabatin resultadonan interesante riba e tema di kerstboom. Entre esnan encuesta, mayoria cu a participa (48%) a bisa cu aña pasa nan no a cumpra kerstboom, y ora cu a puntra si e aña aki ta bay cumpra kerstboom, mayoria (52%) a bisa cu nan lo cumpra kerstbook e aña aki. E motibo principal duna pa no ta cumpra kerstboom e aña aki, ta pasobra ‘no mester di kerstboom pa celebra Pasco. Pero, entre esnan cu si ta cumpra, y cu tin un kerstboom, sea artificial of berdad, mayoria (56%) a bisa cu ta importante pa tin un kerstboom pa Pasco. 

KICO TA IMPORTANTE PA PASCO

Ora cu a duna e opcionan di kico mester tey pa celebracion di Pasco ta completo, e union familiar tabata na prome lugar, cu 24%, sigui pa e cena di pasco y e kerstboom. Na ultimo tres lugarnan tabata ‘baymendo di misa, regalo y e opcion ‘otro’. 

MISA

Den e encuesta aki, a usa e terminologia Misa en general, pero  enberdad a referi despues na e celebracion catolico, di misa di Aurora. Aki mayoria a bisa cu nan no ta bay misa di Aurora, (69%), y 16% a bisa cu no tur. Ta conoci cu mayoria religion ta identifica nan ‘misa’ cu un otro nomber, y cu a pone cu den e encuesta aki, esaki no a keda refleha cu e oportunidad ey. 

DISCLAIMER

Manera tur encuesta di noticiacla, pa grandi of chikito cu e por ta, no ta pretende cu e ta un encuesta representativo di henter e isla. Esaki pa varios motibo. Entre nan, cu no tur hende tin acceso na e forma digital pa participa na e encuesta aki, of porta no ta lesa Noticiacla. E encuesta ta meramente pa midi e interes entre esnan cu ta usuario/lesado di noticiacla, y tin acceso na e Plataforma, sea di un forma diario, of ocasionalmente. Y e resultado ta bira interesante pa metanan puro noticioso. Aunke cu e no ta representativo, e ta keda si algo interesante como tema di discussion.