Tur wowo riba Xander Bogaerts atrobe e aña aki na Merca

FLORIDA – Tur wowo ta riba e pelotero profesional arubiano Xander Bogaerts atrobe na Merca. Den pleno preparacion pa inicia su di dos temporada completo cu Boston Red Sox, prensa mericano tin wowo riba dje mirando su cambionan cu e la implementa y prepara, cu ta dune mas chens pa luci e temporada aki. E la bira mas lihe, y a mehora su prestacion considerablemente segun noticianan for di e campo di entrenamento.

MAS LIHE

Segun informacion ricibi Bogaerts ta pensa mas lihe, actua mas lihe y move mas lihe. Tur ta cosnan cu e mester a mehora e temporada aki, pa e por sigura un miho temporada. Como tal e la bandona Aruba mas prome cu tempo, y acudi na un campo special na Arizona, na Merca. Mientras cu Aruba tabata disfruta di carnaval, Bogaerts a bandona su isla y enfoca riba un solo cos: focus riba su carera y su fayonan cometi durante e ultimo temporada.

SHORTSTOP

Su posicion di shortstop tabata na discusion, mirando su prestacion ultimo temporada y tambe su largura. Normalmente hungadornan pa e posicion ey ta mas chikito di estatura. Pero e la ahusta su mes y compensa pa e ‘problema’ ey. “E ta evidente” e instructor di infield di Red Sox, Butterfield a bisa. “Nos a haci cuater defensa caba di ekipo pa cual e ta un paso adelanta di loke e tabata un aña pasa”.

TEMPORADA ANTERIOR

Tin e pensamento cu a spera mucho hopi di dje den su prome temporada completo como pelotero profesional aña pasa. Apenas 21 aña e tempo ey, a pone hopi presion riba dje. “E ta un posicion critico y un hoben na un edad asina hoben, den un mercado grandi, tabata un reto pisa pa un hoben”. Pero Butterfield tin tur confiansa cu e aña aki lo mira cosnan grandi di Bogaerts.

DEPRESION

“Su pianan tin un proposito. Un meta consistente tur dia. E tabata un tipo di montaña ruso aña pasa. E la gara hopi cos bon (awo).”. Tambe Bogaerts ta mustra mas relaha awor. “E aña aki tabata un diferente tipo di spring training. Mi a bin cu mas confiansa, sabiendo kico ta spera dimi. Specialmente aña pasa siendo mi prome aña, mi tabata un poco nervioso. Pero e aña aki ta diferente. Nos tin un bon team e biaha aki. Mi ta purbando di conoce tur e guynan y mescla cu nan” Bogaerts a bisa.

Despues di un tremendo post season na 2013, tur wowo tabata automaticamente riba dje na comienso di 2014. A presiona cu e lo por bira e nobato di aña. Un cos sigur. Sinembargo cos no a bay mucho bon. Un depresion cu no tabata kier a bay. Den tres luna cu ‘apenas’ 3 homerun y 13 careda empuha. “Nunca mi mester a lucha asina den mi carera. Aña pasa tabata dificil pa sali di esaki” Bogaerts a admiti. E biaha aki e la bisa cu si e mester cay den e depresion ey atrobe, e lo sa con pa manehe e biaha aki. Temporada di baseball grandes ligas ta inicia atrobe dia 4 di april proximo. Mientrastanto nan prome wega di springseason ta dia 5 di maart proximo contra Minnesota Twins.