Cu AOC nobo Tiara Air ta preparando pa inicia nan operacion atrobe

ORANJESTAD - Tiara Air a haya su Aircraft Operating Certificate atrobe recientemente. Esaki minister di Transporte Otmar Oduber a confirma dialuna na NoticiaCla.com. “E ta un proceso basta rigoroso cu nan mester a pasa aden” Oduber a bisa. Nan a perde nan licencia algun tempo pasa pa cual nan mester a stop nan operacion casi un aña pasa. “Awor nan ta bezig cu nan business plan nobo, cu nan a entrega na DCA”. E mandatario a confirma cu ta cuminsamento di e luna pasa (februari) nan a haya un AOC nobo.

 ITTINERARIO

Segun e mandatario a splica, proximamente Tiara lo cuminsa buelonan regional pa entre otro Corsou, St Maarten y Bonaire y Punto Fijo. No por papia di un ‘expansion’ di e compania sino mas bien un proceso di stabilisacion di e compania. “E ta un compania cu pa hopi aña a sirbi comunidad di Aruba. Nos ta sostene un compania asina ki. Sinembargo bo tin responsabilidad di carga cu seguridad. Safety ta algo primordial pa un hende cu ta carga un AOC” e mandatario a sigui bisa. Cierto momento esey no por a wordo garantisa, pa cual a revoca e AOC aki. “Awor un aña despues, e compania a pasa tur su procesonan cu tabata rekeri pa bin na un remarke pa un AOC”. A desea e doñonan tur clase di exito y cu speransa cu pronto por mira nan na e nivel di expansion durante cual a mira nan ultimo añanan.

 DOÑONAN

E doñonan mes, no ta papiando ainda sino mas bien ta preparando tur cos pa nan lansamento proximo y ta premira cu dentro di poco, nan lo anuncia nan operacion di nobo.