Mas di 100 mucha a participa na e concurso di kleur “Stima Bo Mascota” 2021

Posted on 11/18/2021 3:03 pm AST | Updated on 11/18/2021 3:04 pm AST

ORANJESTAD - Mas di 100 mucha a participa na concurso di kleur “Stima Bo Mascota” 2021. Asina e comision encarga cu e proyecto bunita aki, a raporta diahuebs mainta. Manera ta conoci, diabierna 24 di september a inicia e concurso di kleur “stima bo mascota” special pa nos chikitinnan di 4, 5 y 6 aña di edad cu ta bishita scol preparatorio. E concurso tabatin e meta pa sigui conscientisa comunidad, specialmente muchanan, cu nan mascota merece bon cuido, y cu ta masha normal pa laga sterilisa bo mascota. “Nos ta combensi cu si cuminsa inculca e amor pa mascota serca nos muchanan, esey ta garantisa un miho futuro pa locual ta trata e cuido di mascota door di nan doñonan y un escogencia responsabel si ta tuma un mascota si of no” drs Irene Croes, veterinaria den servicio di gobierno a comenta. Dia 4 di november 2021, exactamente 1 luna despues di Dierendag, tabata e ultimo dia cu por a entrega e formularionan di participacion. Un total di 122 formulario a wordo entrega di cual 120 ta den e categoria cu lo ricibi premio. Pues 36 mucha di 4, 74 mucha di 5, y 10 mucha di 6 aña di edad a kleur y entrega nan formularionan debidamente. E comision ta hopi contento cu 2 otro mucha tambe tabatin e curashi pa participa y kier gradici nan pa esey. E top 3 di e scolnan participante ta Agnes Kleuterschool (65), Imelda Kleuterschool (22), y Ayo Kleuterschool (18). Diahueps mainta, dia 18 di november, e huradonan a pasa door di tur e kleurplaatjes pa saca e 7 ganadornan. Dia internacional di mucha, diasabra dia 20 di november, e ganadornan lo wordo anuncia riba e pagina di FaceBook Stima Mi Mascota. E siman siguiente lo tuma contacto cu e scolnan pa informa tocante e entregamento di premio. E comision kier gradici tur mucha cu a participa, tur scol cu a laga e muchanan kleur na scol mes, tur adulto cu a percura pa e kleurplaat wordo entrega na ora, Armando Goedgedrag pa un bunita ilustracion cu e muchanan por a kleur, y tambe kier gradici Compra / Purina pa a yuda haci e concurso aki posibel.

  • Powered by SETAR