FIFA interesa pa yuda drecha stadion di Aruba pa weganan internacional

ORANJESTAD- Asosacion internacional di fubtol FIFA a informa Aruba e siman aki cu e ta interesa pa yuda drecha stadionan cu actualmente ta den mal estado, pa asina Aruba por hunga weganan internacional atrobe riba nan. Asina nan a informa minister di deporte Endy Croes e siman aki. Un delegacion di FIFA tabata na Aruba, mas specifico e FIFA Development Manager – Caribbean region, sr. Marlon Glean y FIFA Development Officer- Caribbean region, sr. Jordan Victoire. Presente tambe na e reunion Presidente di AVB Arubaanse Voetbal Bond, sr. Randolf Lacle y miembro di directiva sr. Hubert Solagnier. Durante e reunion aki, FIFA a pone hopi insistencia cu Aruba mester tin un stadion aproba pa hunga su weganan nacional na cas, nos a elabora di e infrastructura di e stadionnan y algun proyectonan hopi bunita pa den futuro.Minister Endy Croes a sigui bisa cu FIFA tin un programa pa yuda tur nan miembronan, di cual Aruba tambe ta un miembro, y cu nan ta dispuesto pa inverti un capital pa drecha un di e stadionnan na e standard unda cu un di e weganan lo por wordo hunga na Aruba. 

NATIONS LEAGUE

Na luna di juni 2022 Aruba tin un wega di ‘Nations League’ cu Aruba semper a hunga na Merca of Curaçao, si acuerdonan cana manera cu nos ta mirando y por logra firma e acuerdonan prome cu aña caba pa cuminsa  e proceso pa FIFA di su parti  lo por cuminsa saca e fondonan cu e mira pa un di e stadionnan  lo por ta cla pa juni 2022 y Aruba lo por hunga su wega nacional na cas. 

E mandatario a bisa  cu tempo ta mustra cortico pero di acuerdo di e experencia di esnan sinta na mesa di FIFA e ta ‘haalbaar’. Ta e boluntad mester tey pa asina hunto nos mira den mes un direccion. ‘Nos mester haci algun papeleo ‘paperwork’ rapidamente prome cu fin di aña’, Minister Endy Croes a expresa.