A dagvaard lider politico Gerrit Schotte y su partner pa caso Babel

WILLEMSTAD – Tanto lider di partido MFK Gerrit Schotte como su partner Cicely van der Dijs a haya dagvaarding pa presenta den Corte dia 20 di maart proximo pa e caso Babel. Tanto Schotte como vd Dijs a confirma esaki awe merdia pa NoticiaCla.com. Pa medio di un comunicado di Ministerio Publico di Corsou, nan ta informa cu a reserva 20 di maart 2015 pa inicia e tratamento di caso “Babel” den Corte. A indica cu probablemente esaki lo bira un asina yama ‘regiezitting’ cu ta nifica cu no ta bai trata e caso cu contenido. Aki nan ta haci mencion tambe di e dagvaarding di e dos personanan menciona.

ACUSACION

Ta acusa Schotte di “valsheid in geschrifte (vervalsing van facturen en valse opgave vermissing diplomatiek paspoort), (passieve) omkoping, het witwassen van geld en overtreding van de telecomwetgeving (het voorhanden hebben van zogenaamde ‘jammers’) ten laste gelegd.” Su partner vd Dijs ta wordo acusa di “valsheid in geschrifte (vervalsing van facturen), het witwassen van geld en overtreding van de telecomwetgeving.”

ACTONAN COMETI

Segun ministerio publico, e acusacionnan di e dos sospechosonan a keda comete na Corsou, Merca, Suiza i/of Italia durante e periodo entre januari 2010 i december 2013. Durante un ‘regiezitting’ ta plania por lo general e caso cu lo bai ser trata cu contenido. Corte lo bai indica cuanto tempo e ta kere e mester pa trata e dossier cu e sospechosonan, Ministerio Publico ta indica cuanto tempo e mester pa e requisitorio mientras cu defensa ta indica cuanto tempo e mester pa e pleidooi den nan caso. Tambe defensa por indica durante e regiezitting si e tin mas deseo relaciona cu e investigacion. Defensa por ehempel por indica cuanto testigo nan ke laga scucha na Wes-comisario. Corte finalmente ta bisa cua trabounan di investigacion tin cu tuma luga ainda, i tambe tin cu dicidi ki dia i na unda e tratamento di contenido ta tuma luga i con e programa lo ta hinca den otro