Proyecto pa conecta fase 1 y 2 di linear park ta avansando segun schedule

ORANJESTAD – Trabounan di embeyecimento di e beach na Nikki Beach ta programa pa caba aki dos pa tres luna. Awe mainta representantenan di tanto DOW, Thiel Corporation y Van den Broek Construction a mustra e avance di e trabounan. E proyecto mester bira e coneccion entre fase 1 y 2 di linear park. Pa mas di un aña y mey pasa a cuminsa e proceso aki, unda cu fondonan di FDA y TPEF lo cubri e gastonan pa loke ta e trabounan cu ta wordo haci. Mientras ta trahando pa drecha beachnan, encuentronan pa cu e desaroyo di e 'beach policy' ta andando, unda lo reglamenta tanto e sector di hotel y tambe e sector di watersport. Asina aki un ta complementa e otro y ta percura pa crea un plan integral cu lo facilita e problematica cu tin riba nos beachnan na e momentonan aki, e minister di Turismo, Otmar Oduber a bisa awe mainta.

MEHORACION

Ora cu e proyecto keda cla, e lo trece mehoracion den henter e area aki, unda antes tabatin un infrastructura perdi, awor lo por conta cu area accesibel, bunita cu facilidadnan di banjo, kiosco y parkeo pa comunidad y e bishitante. E proyecto aki den su totalidad tin un costo di 2.1 miyon florin. E ta inclui un infrastructura cu lo percura pa brinda loke cu tabata falta na nos beachnan unda e posibilidad di F&B., baño y douche a wordo crea, y si mira banda di esaki lo topa cu henter un infrastructura cu ta brinda facilidad di parkeo y asina aki evita autonan pasa ariba e beach cu tambe ta bay yega na su turno pa wordro drecha.