Conocido publicista Ishwar Daryanani ta bira doño di vespertino Amigoe na Aruba

ORANJESTAD – E cas editorial di e vespertino na Aruba Uitgeverij Amigoe NV ta haya un propietario nobo. Ta trata di e conocido persona Ishwar Daryanani di Ishwar Media y Ismedia Studios. Daryanani no ta un desconoci den e mundo di media y marketing. Cu su 13 aña el a drenta e mundo fascinante aki y fin di e luna aki e ta celebra 45 aña den e mundo aki. Den pasado, Daryanani a ocupa varios funcion publicitario y editorial, manera e.o. Bon Dia Aruba, y tin su propio canal Aruba Tourist Channel desde 4 aña pasa. El a traha na Europa, Merca y Sur Africa tambe pa varios aña riba e tereno aki. 

AMIGOE

Pa loke ta Amigoe, e portal aki por a compronde cu e intencion ta pa Amigoe bira un vehiculo adicional pa su plannan di expansion pa e teritorio Europeo, via e idioma Hulandes. No mester spera cambio na e corant, pa loke ta personal of otro aspectonan editorial. Pero e corant lo bay enfoca si mas riba e tereno digital tambe. Diasabra e corant a publica e acuerdo entre Amigoe di Corsou e compania madre, y su gerente Micheal Voges, y a sigura cu e cambio aki ta algo bon pa e corant, su abonadonan, patrocinadornan y e personal. 

FACEBOOK

Riba su portal, Daryanani a pone e siguiente mensahe di e tema. “Nunca mi por a imagina cu un dia mi lo haña e privilegio di renoba, reconstrui, reorganisa y digitalisa e corant cu mi mayornan tabata haña na cas tur dia. E corrant cu mi a crese cu ne”. E ta recorda cu otro aña e corant ta cumpli 60 aña. “ Nos tur ta Hulandes, nos tur tin paspoort Hulandes, nos systema educacional ta Hulandes, nos leynan ta na Hulandes, bo bay Hulanda bo jega cas tambe. Y nos tin nos mesun corant na Hulandes tambe. Nos tin reporteronan di Hulanda, educa pa crea noticia riba nivel” e ta finalisa bisando. Segun Daryanani, Amigoe mester ta na tur cas. “Bo sa cuanto e ta agrega na nos yuinan su edacucion pa por lesa informacionan actual na Hulandes? Un etapa nobo pa nos tur na Aruba cu lo conose e plataforma nobo di Amigoe Aruba cu lo revoluciona prensa na Aruba y Hulanda” Daryanani ta finalisa bisando riba su pagina. Potret ta di Facebook.