ORANJESTAD – Si ta pa e Procurador general nobo di Aruba, nos isla lo carga e proyecto pa establece un centro Terbeschikkingstelling osea TBS, cu eventualmente por wordo usa pa islanan di Caribe Hulandes tambe. Por lo menos, si ta pa e Procurador General di Aruba nobo mr. Bote ter Stege cu a bisa esaki recientemente den e programa Noticiacla LIVE. E la yega na acuerdo cu otro PG di e islanan pa haci esaki. Y mes momento e ta compronde cu Hulanda tambe a compronde cu e ta algo necesario pa nos akibandanan.
CLA KI ORA?
E no ta kere cu si cu ainda pa ora cu e bay, e clinica ta estableci, pero loke si por haci, ta pa organisa un tipo di TBS riba nivel cu no ta e nivel den resto di Reino pero cu si por yuda Aruba den cuido y maneho di hende cu tin e necesidad aki, prome cu nan a caba sinta nan castigo. E PG ta admiti cu inicialmente tabata Corsou cu tabatin e intencion di carga esaki, pero e la tum’e riba su mes pa Aruba lidera e proyecto aki. E ta spera cu pa na fin di su termino como PG na Aruba (aki 3 aña segun contracto), cu esaki bira un realidad.
KICO TA TBS
Manera informa caba, TBS ta nifica ‘terbeschikkingstelling, cu ta un tipo di medida cu un huez por impone riba un persona cu a comete un crimen, pero di cual e tabata parcial of totalmente irresponsabel pe, debi na su estado mental. Si e persona aki wordo diagnostica cu e estado mental aki, e ora e huez por impone e medida aki. Den nos region no tin un centro asina ainda, cu ta pone cu sea mester manda e persona aki cu a comete e crimen, pa Hulanda of mester interne den un area aleha den prizon local.
NO RESPONSABEL
Debi na e hecho cu un persona cu a keda diagnostica cu e malesa aki, e chens ta hopi grandi cu e por comete un fayo, cu por resulta den un tipo di crimen. Pa por proteha comunidad, ta importante pa e culpable, banda di sinta su castigo, haya e chens tambe pa wordo trata pa e malesa, osea e tratamento TBS.
Algun aña pasa, huez a impone e castigo aki pa e homber cu a comete e crimen contra e dos criaturanan cu a fayece di un forma hopi cruel y a conmove comunidad, poniendo cu Gobierno a implementa e asina yama Sociaal Crisis Plan.
ORANJESTAD – E persona doño inicial di e cacho Blacky cu a haya e nomber despues di Khaleesi, mester presenta dilanti huez dia 22 di mei proximo. Asina corte a informa diahuebs ultimo. Ta trata di e ciudadano Alberto Groeneveld. Ora cu e caso a bira conoci, esaki a haya masha hopi reaccion di comunidad, cu a desemboca finalmente den un caminata di protesta contra maltrato di bestia. Groeneveldt ta wordo acusa di, den e periodo di prome di januari 2024 te 26 di maart 2024, varios biaha y sin ningun meta y surpasando tur loke ta permiti, a intencionalmente haci un bestia (un cacho di nomber Khaleesi) dolor y/of causa e cacho herida y/of a perhudica salud di e cacho, dor di laga e cacho pa tempo largo mara na un cadena demasiado cortico y inadecua y/of a keda sin duna e cacho e cuido necesario, dor di keda sin duna e cacho cuminda y/of awa pa e bebe y/of cuido pa su heridanan y/of remedi.
ORANJESTAD – E asosacion di radio na Aruba (Aruba Broadcasting Association-ABA) y e fundacion DUCAPRO (registro di derecho di artista y musica) no a haya otro ainda riba e suma cu radionan tin cu paga pa por tin derecho pa toca cierto musica na nan radio. Por lo menos, den forma inoficial ya cu ningun di dos partido ‘oficialmente’ a duna un reaccion. Conforme un caso sumario un luna pasa, huez a ‘suspende’ e caso y a duna partidonan te cu 24 di April (ayera) pa yega na otro riba e suma. Di otro forma, lo mester continua cu e caso y eventualmente dicta un sentencia, cu ta traduci na un suma stipula pa corte cu radionan mester bay paga DUCAPRO pa toca cierto cancionan na nan respectivo emisora.
ORANJESTAD – E testigo principal di parti defensa den caso Flamingo, den e caso aki, e hefe di BCI, lo no por declara dilanti Huez Comisario. Asina ex minister Otmar Oduber a declara publicamente diamars. Segun e ex mandatario, Huez Comisario a informa nan diabierna ultimo cu e motibo ta cu salud di e testigono ta permiti.
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.