Ganadonan di e "Meet & Greet Car Show" a ricibi nan premio

ORANJESTAD -  “Nos a spera 80 auto mas o menos pero na final nos a conta 125 auto cu a participa na e prome Meet & greet Car Show organisa pa Garage Cordia Aruba. Nos ta haci esaki den cuadro di nos celebracion di 50 aña na Aruba, representando e miho marca di auto na mundo, Toyota”, asina Danilo Werleman, gerente di Garage Cordia Aruba a duna di conoce diabierna na momento di entrega premio na e ganadonan.

E agencia di autonan di marca Toyota, Lexus y BYD a organisa un “Happy Hour” pa celebra hunto cu e ganadonan di e evento. Meta di e “Meet & Greet Car Show” no tabata pa tin competencia, pero asina mes tabatin algun modelo di auto cu a resalta pa cual no por a keda sin reconoce nan. Hopi hende kisas no ta para keto na e hecho cu e doñonan di e autonan aki ta inverti hopi tempo, placa, pasenshi y energia pa por mantene autonan di tanto aña asina, cu ta rekeri piesanan cu hopi bes no ta existi mas. E smaak pa sigui mantene un auto asina riba caminda, ta algo di elogia y aplaudi. Durante e evento, a parti un papel chikito pa tur presente por a vota pa e modelo bieu mas popular, pa e auto di mas aña y tambe por a vota pa e auto mas bunita. E categorianan aki a haya un cantidad di voto di parti di e publico grandi cu a presencia e evento den cura di Garage Cordia Aruba situa na Camacuri.

Asina por menciona cu pa e modelo mas popular, na di 3 luga a keda Jonovan Rosel, na di 2 luga Ale Vrolijk y na prome luga a keda Bryan Maduro. Den categoria di auto mas bunita na di 3 luga a keda Javier Vermaas, sigui na di 2 luga pa Bryan Maduro mientras cu na prome luga a keda Vickmar Winklaar. Pa e auto di mas aña den e show, a honra Hubert Croes cu a presenta cu su Toyota Pickup 1000, esta e pickup modelo chikito, di a?ña 1972. Cada un di e ganadonan a ricibi un plakkaat como reconocimento y un envelop cu un sorpresa. Di e forma aki Garage Cordia ta mustra su aprecio na e doñonan di auto cu ta hinca asina tanto esfuerso den nan auto stima. No ta coincidencia cu mayoria di e autonan tabata di e marca Toyota, confirmando asina e durabilidad di e marca di auto aki y e facilidad pa por haya piesa pa mantene e auto riba caminda.

Durante e evento tabatin un show di paintbrush, den cual tabata pinta autonan durante e evento. E artista a pinta un modelo bieu di Toyota y a regala e agencia durante e evento. E lo haya un luga special den e showroom di Garage Cordia, como un recuerdo bibo di e evento pero sigur di e añanan den cual a bende un cantidad di modelonan historico di Toyota na Aruba. “Nos ta pensa di organisa un evento similar asina e aña aki ainda, pero nos no a scoge e fecha ainda. Cu e cantidad record di participacion banda di e interes asina grandi di publico, mi ta kere cu ta hopi duidelijk cu tin un demanda grandi pa tipo di eventonan asina. Y mi ta kere tambe cu e cura di Garage Cordia a demostra di ta ideal pa e tipo di eventonan asina pa henter famia”, asina Danilo Werleman a termina bisando.