Minister considerando pa draai bek maneho di niet zittenblijvers

ORANJESTAD -  Tin posibilidad cu e actual gobierno (lesa: minister di enseñansa Endy Croes) lo por draai bek e decision riba ‘niet zittenblijvers’, esta e plan pa ningun alumnonan keda sinta. Manera ta conoci, na September 2019, ex minister di enseñansa Rudy Lampe a bin cu e maneho di zittenblijvers, unda cu no tabata bay tin mas ‘zittenblijvers’, osea cu niun alumno ta keda sinta mas. Sindicato di maestro Simar mesora a bay contra di esaki. Awor ta resulta cu despues di reuni cu hopi cabesante di scol, tin chens cu por draai esaki bek. Asina e mandatario nobo di enseñansa a bisa dialuna durante su conferencia di prensa. 

REUNI

Segun e mandatario, el a haya hopi comentario di e cabesantenan di scol riba e tema ‘pakico si y pakico no’ lo mester mantene e regla actual. “Nos lo tuma cierto decisionan den futuro cercano al respecto, e maneho aki. Y si mester bay bek na e sistema cu e ‘niet zittenblijvers beleid’, cu porta no a funciona manera nos tabata kier” e mandatario a bisa. “Nos lo tin cu draai esaki unda cu tin un draagvlak, pero cu bon argumentonan tambe pa e mayornan tambe lo por compronde” e mandatario a sigui bisa. E no a pone un fecha si pa esaki keda revoca of no, pero e ta un asunto cu tin prioridad. 

SINDICATO  SIMAR

E sindicato di maestro tabata contra e plan di minister di Enseñansa Rudy Lampe pa ‘no tin mas zittenblijvers’ sin mas y den henter e liña di enseñansa. Tabata dia 20 di September 2019 cu e ex mandatario a saca e comunicado aki segun un comunicado di Directie Onderwijs di dia 13 di November 2019. Sindicato di Maestro SIMAR a informa cu nan ta contra di e plan aki, pasobra e forma con e ta aworaki, no tin ‘rand voorwaarden’ pa e ‘idea di minister’ cana manera mester ta. 

REUNION CU MINISTER

Sindicato a sinta cu e mandatario e tempo ey unda cu e ex-mandatario a confirma e asunto di zittenblijvers e tempo ey. Simar a informe cu e ta un idea cu actualmente no por ta na Aruba, pasobra pa por hacie, mester tin e randvoorwaardennan, pa asina por duna e decision nobo un basis stabil pa wordo ancra. E mandatario a informa basicamente cu e decision tabata tuma caba y cu el a manda e comunicado caba. Simar a mustra e ora cu nan no por sostene algo cu por bira negativo pa maestronan. Esaki pasobra e ‘regla nobo’ ta bay pone mas peso riba maestronan, cu nan tin actualmente caba. 

DIRECTIE ONDERWIJS

E sindicato a logra sinta cu directie onderwijs un luna despues, unda cu e departamento a informa nan cu e abolimento total manera cu minister kier, no tabata posibel enberdad, pero lo a bay wak con pa reduci e cantidad e zittenblijvers, y concientiesa e maestronan riba e parti di zittenblijvers. Esey sindicato ta haya bon, pasobra sikiera maestronan por sigui determina ki ora un mucha ta un zittenblijver of no. Tambe directie onderwijs a bisa di a sinta cu varios scol riba e tema aki. Simar a reitera cu no ta contra inovacion den enseñansa, contal cu e sosode di un forma responsabel y corecto, manera prepara e randvoorwaarden. Simar tambe a enfatisa cu nan no a firma ningun acuerdo riba e tema y a simplemente wordo informa.