Futuro di CFT na Aruba ta keda un discusion den comunidad

ORANJESTAD – Mientras cu comunidad di Aruba e fin di siman tabata comenta riba e presentacion di e College Financieel Toezicht (CFT), gobierno a mustra diadomingo un biaha mas cu kico cu sosode, gobierno tin e ultimo palabra. Den un comunicado emiti diadomingo, e mensahe di e mandatario di finanza, Angel Bermudez tabata basta cla. E la recorda un biaha mas cu e la indica na e colegio di supervision aki (CFT) cu nan experticio por ta valioso den su trabao, pero semper y cuando riba su peticion. Di parti di e presidente di CFT mes, -Age Bakker- , su comentario na NoticiaCla.com tabata cla: Splica con nan a yega na e consehonan cu nan a duna gobierno di Aruba recientemente. “Mi a haya importante cu nos por a conta nos storia riba esaki” Bakker a bisa. Politicamente e topico ta keda un topico dividi. Lider di fraccion Rene Herde a ripiti esaki un biaha mas diadomingo. “Nos di AVP a y ta sigui mustra nos comunidad cu e impresion cu CFT kier crea no ta corecto. E acercamento di CFT ta uno strictamente pa yega mas lihe posibel na un balansa di finansa publico.”. Di parti di e fraccion di oposicion mas grandi MEP, Wever tabata positivo. Wever-Croes a gradici CFT pa tuma tempo pa e reunion y duna asina tanto informacion. “Nos ta contento di por a haya e informacion di CFT mes. Awor nos sa con CFT ta funciona” Wever a bisa.

BAKKER

E presentacion di CFT mes a percura pa un sala completamente yen, y un patio tambe na Universidad di Aruba (manera NoticiaCla.com a raporta for di diabierna anochi). Bakker, den su comentarionan adicional pa NoticiaCla.com :“Nos a duna algun conseho na gobierno di Aruba riba peticion di gobierno mes. Y nos a haya ta bon pa nos bin splica con nos a yega na e conseho aki” Bakker a bisa. “E impresion cu mi a haya, di e interes cu tabatin, ta cu hendenan tabata masha interesa pa tende esaki. Cu tabatin necesidad grandi pa informacion debi na e falta di esaki. A base di e tipo di preguntanan, mi a ripara cu e topico ta biba enormemente”. Bakker a ripara cu e topico tabata biba den comunidad. “(Ma ripara) cu enberdad ta papia hopi riba e topico aki. Tambe mi a ripara cu tabatin comprension cu e formato di CFT por ta beneficioso pa e pais. Esta, ordena e proceso presupuestario, fortifica e tarea di parlamento, monitor e presupuesto durante curso di e aña y no solamente durante trahamento di esaki. Esey tabata e preguntanan cu mi a haya confronta cune. Na final mi ta sinti cu ta bon cu nos a presenta nos mes awe. “ Bakker a finalisa bisando.

BERMUDEZ

E mandatario diadomingo a ripiti (pa medio di un comunicado) cu e ta di opinion cu anticipando e introduccion di Aruba su propio Fiscal Council (Aft), e miembronan di e colegio (CFT) por comparti nan experticio cu esunnan di Aruba. E colaboracion aki ta topico di combersacion pa varios luna caba entre Minister Bermudez y Hulanda, pues e mandatario ta spera cu pronto e dos paisnan por yega na un consenso riba con e colaboracion aki por wordo legalisa riba un base di igualdad, ya cu e asina yama “Rijkswet Financieel Toezicht” cu ta conta pa e otro islanan, no por drenta na vigor pa Aruba.

AVP

Lider di fraccion di AVP Rene Herde, papiando na nomber di su partido, a bisa ayera cu den e campaña di propaganda pa wordo acepta den comunidad di Aruba, CFT ta conta masha bunita cu nan ta imparcial y cu nan trabou ta limita na duna conseho. “CFT kier hasta crea e impresion cu nan tin un contribucion positivo na desaroyo di e pais” Herde ta cuminsa na bisa. “Nos di AVP a/ y ta sigui mustra nos comunidad cu e impresion cu CFT kier crea no ta corecto” Según Herde, e acercamento di CFT ta uno strictamente pa yega mas lihe posibel na un balansa di finansa publico. Nada mas. “Pa logra esaki tur otro area di pais ta wordo lubida. E consecuencianan pa economia, cuponan di trabou y bida social den comunidad no ta conta”. E ta mustra cu pa esnan cu no kier kere, e kier pa wak e consecuencia di cinco aña di CFT na nos hermana isla Corsow. “Wak con Corsow ta awe cinco aña despues cu CFT a tuma finansa publico over, a impone medida y stagna economia. Esaki ta loke nos di AVP no kier pa Aruba” Herde ta sigui bisa como parti di e comunicado emiti.

MEP

Papiando pa su partido MEP, e lider Evelyn Wever-Croes a gradici CFT pa tuma tempo pa e reunion y duna asina tanto informacion. Lider di MEP mes momento ta lamenta e negativismo cu especialmente lider di fraccion di AVP sr. Rene Herde a demostra durante e reunion aki, demostrando claramente cu AVP no kier somete su mes na ningun forma di control, y cu AVP kier djis sigui hasi y deshaci. “Mi ta lamenta si cu cos mester a bai asina leeuw, cu e gobierno di AVP a causa un desastre financiero y awor nos mester papia di supervision. MEP ta di opinion cu nos mes mester por atende cu nos asuntonan. Ta pasobra nos a neglisha, otronan mester a bin pa drecha cos! Den e siguiente dianan lo duna mas informacion tocante e reunion aki” lider di MEP Evelyn Wever-Croes a duna di conoce den su comunicado. 

RANDALL CROES

Algun persona conoci den comunidad a duna nan opinion despues di e lectura di CFT. Un di nan tabata conocido economista Randall Croes. Segun Croes, e lectura tabata hopi informativo. “Nan a splica e situacion financiero, e grafico cu opinion, a compara nos cu otro y ta importante pa tin un opinion neutral. Nan a splica e situacion con e ta, y nan tarea. Nan ta mantene nan mes profesional, a politico pa pueblo por respeta nan. “ Nan tin solamente como obhetivo, salba e situacion financiero di tur e partnernan den Reino cu ta cay bou di nan”, Croes a finalisa bisando.

LEO MADURO

Un otro persona, cu a papia a ‘base personal’ ta e conocido Leo Maduro di Camara di Comercio. Pa Maduro, e tabata un exposicion bon. Pa e insider nan e no ta trece novedad cu nos conoce. “Nan a haci bon pa presenta nan mes. Den prensa ta sali segun e color politico loke ta bon of malo. Manera nan mes ta bisa, nan ta haci un trabou na nivel profesional” Maduro a bisa. Nan no ta esun cu ta bay den un debate cu e politico kico e tin cu haci. “ Mi ta kere cu e no a crea mas pregunta. Loke nan no por bay aden ta loke ta ‘bay happen next’. Eynan ta 5 voor 12 caba. Bo no por keda pospone momento cu bo tin cu atende bo debenan”. Aki Maduro ta referi na e debenan pendiente. “ Y e aña aki Aruba tin bastante debe. Tres obligatie lening. Uno awor, mei, y na september di 166 miyon, cu pa e tempo ey bo mester tin bo cosnan regla pa bo por haya placa fia for di Hulanda” Maduro a finalisa bisando.