Laboratorio di Servicio ta obliga pa stop di duna servicio na pashentnan di AZV te cu fin di aña

ORANJESTAD - Lastimamente, entrante dialuna, 8 di november, 2021 y te cu 4 di januari, 2022 LdS no por brinda servicio di laboratorio na pashentnan di AZV. Asina LdS ta bisa. LDS lo keda brinda servicio  na clientenan priva (esnan cu ta paga pa nan testnan). 

E motibo pa esaki ta door cu AZV ta aplica un presupuesto maximo anual pa cada laboratorio priva y LdS a alcansa su presupuesto di 2021. LdS, como un laboratorio medico ISO acredita y un di e provedor di mas grandi di servicio di laboratorio na Aruba, claramente ta lamenta esaki y no ta di acuerdo cu e decision. E logica di e presupuesto ta cuestionabel segun LDS, ya cu LABHOH no tin un presupuesto maximo, y mas ainda un presupuesto anual no ta yuda AZV spaar placa dor di sera LDS. Un pashent lo simplemente hasi uso di servicio di laboratorio na un otro laboratorio. E unico resultado di esaki ta cu pashentnan no lo por uza servicio di  laboratorio di nan escohencia, algo contra e principionan basico di AZV.  Laboratorionan priva cu ta resalta den calidad y servicio na cliente ta wordo castiga pa nan excelencia door di AZV.

LdS a trata di convence AZV pa aumenta e presupuesto di 2021, pero esaki sin resultado. Aunke e decision ta completamente for di nan alcanse, LdS e disculpa pa e inconveniencia na nan fiel clientenan y ta pidi cordialmente pa uza un otro laboratorio durante e periode aki. 

Pa cualkier pregunta, nan ta pidi pa please tuma contacto cu LdS na: info@laboratoriodiservicio.com.

Laboratorio di Servicio a sigura di continua cu nan servicionan di calidad halto na Aruba y haci nan maximo esfuerso pa por duna un servicio excelente, den vecindario di oficina di dokter, pa asina logra yuda diagnostica y controla malesanan of condicionnan, den un manera confiabel y sigur. 

Laboratorio di Servicio a finalisa na nomber di nan  Clinical Chemist/ Medical Director Dr. Robert M.F. Wever bisando cu nan ta ansioso pa brinda servicio na tur pashent di AZV atrobe otro aña!