Organisadonan buscando lugar pa tene Soul Beach Music Festival

ORANJESTAD – E team di Soul Beach Music Festival ta bezig ta ‘sondea’ un lugar nobo pa tene e festival e aña aki. NoticiaCla.com a compronde cu e aña aki nan no tin un lugar fiho ainda pa tene e festival, debi cu e lugar ‘acostumbra’ no ta disponibel mas. E lugar tabata e beach pariba di ‘Nikki Beach’, tambe conoci como Surfside. Akinan ta trahando un desaroyo nobo pa conecta dos fase di Linear Park. Segun informacion cu nos tin, ta bisa cu no a tene cuenta cu e aspecto aki ora cu a diseña e parti ‘nobo’ actual. Dialuna mainta mientrastanto minister di Turismo Otmar Oduber lo tene un conferencia di prensa pa splica desaroyo riba e parti riba e beach.

LUGARNAN PA TENE E FESTIVAL 

Cu excepcion di un of dos biaha, semper e festival a wordo teni riba beach, cu ta duna honor na e nomber “Beach” den e titulo di e festival. Ta custumber cu e festival ta wordo teni riba e beach na Surfside. Pero awor pues cu esaki no por mas, e organisadonan ta buscando un otro sitio. Y te cu siman pasa ainda, a compronde cu no a haya un sitio unda cu e festival awor tin cu tuma lugar. 

FECHA DI E FESTIVAL

E festival ta programa pa tuma lugar entre 20 pa 25 di mei proximo, cu ta e “Memorial Day weekend’ pa cual mericanonan ta biaha bin Aruba. E unico dos artistanan cu ya caba ta propaganda, ta e conocido Trey Songz y Charlie Wilson. Por lo menos segun e website di e evento. Ta un custumber, cu contrario na otro concierto (manera CNSJ), e artistanan ta keda conoci mas laat. Esey no ta kita afo cu e festival ta uno bon bishita.