Encuesta di noticiacla via Facebook ta bisa ‘no’ na carnaval 2022

ORANJESTAD – Segun e ultimo encuesta pa usuarionan di noticiacla riba Facebook, celebracion di Carnaval 2022 no mester tuma lugar. Ni si cambia e fecha y haci esaki pa p.e. zomer manera cu ta wordo sugeri pa e instancianan competente. Gran parti ta cita Covid19 como e motibo, indicando cu no ta responsabel pa tene celebracion di carnaval ainda. E encuesta a usa participantenan cu tin acceso na e pagina di Facebook di Noticiacla, pues ta solamente esnan cu tin aceso na e pagina aki y a haci algun pregunta simple riba e tema. Asina mes, e ta un bista interesante pa raporta. Un total di 553 persona a participa na e encuesta aki durante 3 dia. 

E RESULTADO

Mientras cu e cantidad di pregunta no tabata hopi, nan tabata simple y ‘dirigi’. E ta cuminsa na puntra si e usuario a participa na e ultimo carnaval na 2020. Aki 64.3% a bisa cu no, mientras cu 35.7% a bisa cu si. Tambe a puntra si ta responsabel  pa celebra carnaval den 2022 teniendo cuenta cu Covid19 y su efectonan. Aki 57% a bisa cu no ta responsabel, mientras cu 18.7% a bisa cu si. Tin un grupo tambe cu a bisa cu ta mucho tempran pa determina esaki ainda y esey tabata 24.3%. Awor, si e instancianan concerni dicidi cu toch ta tene carnaval, 61.1% a bisa cu nan lo no participa, mientras cu 23.5% si lo participa y 15.4% a bisa cu nan no sa ainda. Si cambia e temporada y hale pa p.e. zomer (juli) envez di januari/februari, 69.2% a bisa cu nan lo no participa, y 30.80% a bisa cu si. 

TA RESPONSABLE PA TENE CARNAVAL DEBI NA COVID19?

SI TIN CARNAVAL?

SI TIN CARNAVAL NA ZOMER?

DISCLAIMER

E encuesta aki tabata accessible solamente via internet, y pa e   personanan cu tin aceso na Facebook y cu por subi riba e pagina aki. E pagina di Facebook di Noticiacla tin 27,476 usuario registra.  Y como tal e portal aki no ta pretende cu esaki ta un bista representativo di henter e isla, sino ta un bista di momento entre esnan cu ta usuario di noticiacla.