Pa Maart 2022, Ministerio Publico lo tin un fiscal ‘yiu di tera’ mas acerca

ORANJESTAD – Si ta bon, pa otro aña maart (2022), Aruba lo tin un otro fiscal ‘yiu di tera’, banda di esun actual esta mr Patrick vd Biezen. Asina Procurador General mr Bote ter Steege a bisa e siman aki den e programa Noticiacla LIVE. Segun ter Steege, e intencion ta pa e cuerpo di fiscaklden Ministerio Publico consisti di 50% fiscal yiu di tera y 50% Hulandes Europeo. “Esey ta un bon mix”, ter Steege a sigui bisa. E fiscal nobo lo ta un persona femenino di fam Paesch. Awor e la wordo tuma den servicio, pero e proceso pa e por huramenta como fiscal ainda ta largo. Awor e lo cuminsa cana e caminda pa aclimatisa su mes riba e islanan den Caribe Hulandes, pa despues sigui pa su estudio final na Hulanda. Unabez si e pasa esaki cu exito, ta premira cu pa comienso di maart di otro aña e por cuminsa labora como fiscal na Aruba. 

FISCAL YIU DI TERA

Tabata 3 aña pasa cu e unico fiscal actual ‘yiu di tera’, mr Patrick vd Biezen a cuminsa labora na Ministerio Publico na Aruba. Prome cu esey,  e la traha 5 añanan cu e bufete di abogado Chris Lejuez como abogado, y despues a tuma e reto pa cambia ‘di banda’ y integra den e ekipo di fiscal. “Despues di 5 aña trahando na oficina di abogado Chris Lejuez, e dia a yega pa mi continua cu mi carera” vd Biezen a bisa riba su pagina di Facebook e tempo ey na 2019. Lejuez a contesta mesora cu e palabranan ‘Mi ta premira un future briyante pa bo como fiscal”. Vd Biezen a studia derecho penal na Erasmus Universiteit.