Ter Steege: Niun minister por bisa un PG cua caso e tin cu persigui

ORANJESTAD – ‘No tin un minister, ni na Aruba of Hulanda cu por prohibi un Procurador General (di haci un caso) y bis’e ki tarea e tin pe’. Palabranan fuerte di e Procurador General di Aruba mr Bote ter Steege e siman aki den e programa Noticiacla LIVE. Mas prome den aña el a bisa tambe cu e dia cu nan tin cu bise kico pa haci, ta e dia tambe cu e ta tuma su retiro. “Den nos leynan, ta hopi cla scirbi cu Ministerio Publico riba e decisionan cu nan tuma riba tereno di dossier di casonan penal, nan ta completamente independiente”. E unico control cu tin eynan, ta door di Corte of Hof. “Esey ta e independencia di Ministerio Publico” mr ter Steege a sigui bisa. Esaki basa riba possible pensamento cu por tin metemento politico den e aparato hudicial aki. 

ORGANO ESTATAL INDEPENDIENTE

Di otro banda, e ta splica cu OM no ta un organismo estatal independiente, pasobra tin minister di husticia cu ta politicamente responsabel pa Ministerio Publico, y Parlamento finalmente ta e organo di mas halto na mando. “Pero, nan no por mete cu un decision riba contenido na Ministerio Publico”, e PG a sigura den e pograma. 

LIÑA FINI CORA

E ta admiti cu tin un liña hopi fini cu ta separa politica di husticia y pesey e ta haya ta bon cu tipo di puntonan asina ta keda bin dilanti pa por papia ariba y splica esaki bon. “Pasobra hopi hende dado momento no ta kere bo mas” ter Steege ta bisa. Y e ta sigui elabora riba dje. E ta usa e medio social como un ehempel. Ora cu durante un conferencia di prensa den pasado el a haci cierto declaracionan, e por a tuma nota di comentarionan riba Facebook, comparando e cu p.e. Pinocchio, cu e nanishi ta crece, implicando cu e lo ta gaña. E ta conciente cu bo tin hendenan asina semper tambe. Pero tin hende tambe cu ta bisa cu por bien ta cu e PG ta haci cierto declaracionan, pero e situacion en realidad no ta asina. “Y e ora mi ta puntra mi mes, cuanto biaha mi tin conta e situacion aki e ora” e PG ta sigui bisa. E ta compronde pakico tin hende no ta kere loke e por ta bisando, pero mes momento e ta bisa tambe cu no tin prueba pa demonstra e ponencia di duda di e hendenan aki. E la referi na un rapport di WOCD di 2012, unda cu aki a keda estableci cu riba e toma di decision di ki caso ta wordo persigui y cua no, no tin influencia politico.