PG ter Steege: Persigui un politico penalmente, no ta persecusion politico

ORANJESTAD –  Persigui un politico penalmente, no kier men cu ta persecusion politico. Esaki ta ponencia di e actual Procurador General di Aruba Bote ter Steege. E caso penal contra ex minister Benny Sevinger, no ta un asunto di ‘persecusion politico. Mientras cu e PG di Aruba no ta menciona ni e nomber di e caso Avestruz ni e nomber di ex minister Benny Sevinger, ta cla cu e la referi na e caso ey den e programa Noticiacla LIVE cu periodista Tito Laclé e siman aki. “No ta trata di un caso di persecusion politico” ter Steege ta sigura e periodista. “Loke si ta sosode, ta cu un politico, of un ex politico ta wordo persigui. Y esey sigur tin consecuencia politico” e PG ta sigui bisa. “Pero, no tin politico cu ta wordo persigui, pasobra e ta un politico. Laga mi ta hopi cla den esey”, e hefe di Ministerio Publico ta sigui bisa. 

E FAMOSO CARTA PA BENNY SEVINGER

E PG ta referi tambe na e awor ‘famoso carta’ cu e ex minister Sevinger a ricibi e tempo ey di e fiscal Gerritsen riba e status di su caso. Den e carta, solicita pa e ex minister, Ministerio Publico ta bisa e.o. cu lo no tin persecusion pa awor sino mas bien pa September 2021. Sinembargo apenas algun siman despues, Sevinger a keda deteni y encarcela pendiente investigacion. Despues e la recobra su libertad temporal pendiente e caso. “E carta ta mustra hopi cla cu tabata trata di un planificacion, y cu e (fiscal) tabata premira cu e dossier final lo tabata cla na September 2021 y presenta” e PG a cuminsa na bisa. “Ya, tin hende cu ta interpreta esaki como un compromiso. Esey no ta e caso”, ter Steege ta sigui bisa. Ademas e la referi na un declaracion cu OM a haci repetidamente anteriormente riba e tema ey. Despues e la mustra riba e hecho cu diripiente gobierno a cay. “Ken por a pronostica cu e gabinete (Wever-Croes) lo a cay. E investigacion a continua normal. Cada luna, tabata sigui esaki y wak kico mester haci etc. Cos a bira complica, aparentemente, ora cu e gabinete a entrega su retiro” ter Steege a sigui bisa. Pasobra e ora mester a bin eleccion nobo. “Manera cu nos tabatin’e planea, loke a sosode tabata puro coincidencia” e PG ta sigui bisa. “Y claro cu a puntrami cu PG, nos mester tarda esaki?, Y e contesta tabata no. Nos no por. Nos ta sigui haci nos trabou. Nos tin un orden hopi cla. Nos mester haci un investigacion. E mester resulta den un procesverbaal, y e mester resulta den un caso. Nos ta sigui normal” ter Steege a sigui bisa. E ta mustra cu ta netamente tabata purba evita di ta den e discussion politico. “Pero retiro di un gabinete, no ta asunto di Ministerio Publico.  

PERSECUSION

Segun ter Steege, e ta compronde e punto si, pasobra p.e. na Hulanda tambe tabatin politiconan cu a keda persigui y cu tabata prome pa yama cu ta un ‘persecusion politico’. “Wak, mi ta wordo persigui como politico”, ta loke e politico ta core grita e ora ey segun e PG. “No. Mescos cu nos tur, sr Laclé, politiconan no por comete delitonan castigabel”. E ta mustra cu tur hende cu comete un delito penal, e tin cu responsabilisa su mes pa esaki. Y den un caso di un politico ta conta mescos. E ta compronde si tambe cu ora cu un politico ta wordo persigui penalmente, cu su siguidornan ta bira preocupa.