Varios politico y gobernante di Bonaire a keda menasa cu morto

KRALENDIJK – Varios gobernante, for di Gezaghebber te na diputado y lider politico na Bonaire a wordo menasa cu morto diaranson. Ta trata di un post riba Facebook di un tal Wim van Huizen, cu a pone 50 mil dollar riba cabez di cada un di e 4 gobernantenan of lider politico menasa. Esnan cu a ricibi menasa ta Gezaghebber Edison Rijna, diputadonan Nina den Heyer (MPB) y James Kroon(Diputado y lider di UPB) y lider politico Elvis Tjin Asjoe (MPB). Den un reaccion na noticiacla, Gezaghebber Rijna a confirma cu e la haci denuncia contra esaki.

REACCION RIJNA

“Lamentablemente e situashonnan aki tambe ta parti di mi trabou awendia. Ta ferfelu pero nos ta sigui traha pa un miho Boneiru”, Rijna a cuminsa na bisa. “Danki pa bo sosten, Boneiru ta sigui ta un isla safe pa nos tur. Bon Bini i nos ta kwida!”. 

DEMAS POLITICO

Un di e diputadonan cu a reacciona pa noticiacla tambe tabata Nina den Heyer. “Ta un lastima cu personanan ta scohe pa scohe e caminda di menasa i trata na trece miedo enbes di scohe e caminda di dialogo saludabel. Menasa no mester wordo tolera den ningun forma i contra di ningun hende. Y komo comunidad nos mester sigui duna nos desaprobacion pa comportacion negativo asina” e mandatario a bisa. Den caso di lider di MPB Elvis Tjin Asjoe, esaki tabata su comentario pa noticiacla:” Mi ta sumamente indigna cu e menasa aki. Mi ta spera cu e biaha aki si Ministerio Publiko actua rapido i gara i castiga esun of esunnan responsabel” Tjin Asjoe a cuminsa bisa.  “ E impakto riba nos cu a risibi e menasa i nos famianan ta grandi. Pero e cos aki a impacta nos comunidad tambe. Actonan asina aki ta crea angustia den seno familiar pero e impacto ta riba henter nos comunidad. No papia mes cu e tipo di menasanan aki riba Facebook cu suma mara na dje por trece otro riba e idea pa ehekuta esaki. For di ayera mainta mi a yama pa start e proceso di denunsia. Mi ta wardando pa wordo yama bek pa finalisa e denunsia. Asina nos sa hasie. No ta prome biaha.” e lider politico a finalisa bisando. No a logra haya reaccion di diputado Kroon ainda.