Varios detencion y arma confisca durante accion di listramento pariba di brug

ORANJESTAD - Durante fin di siman, den presencia di minister di husticia Arthur Dowers, hunto cu alto comisario di polis, Dolfi Richardson, a tene e prome accionnan pariba di brug den cual polisnan a drenta varios bario pa tene control y accion preventivo buscando arma y droga. Varios ekipo di polis a traha den e accion, sea na e sitio mes of riba un distancia.

AREANAN DI ACCION

E accionnan a concentra den area di Sabana Basora, Mabon, San Nicolas, Village y De Vuist. Durante accion aki a confisca varios arma blanco, manera machete, cuchiu, sker y otro artefactonan skerpi cu ta uza ora di pelea of pa menasa hende cune. Varios detencion a cay pa tanto arma blanco pero tambe pa posesion di droga, manera Marihuana. No a haci mencion si cuanto persona a wordo deteni, segun e comunicado.

REGLA PA POR LISTRA

Di acuerdo cu nos codigo di procedemento penal, Polis por listra un ciudadano solamente ora e detene. Pa por detene un persona, e mester ta un sospechoso, mester a comete un delito of mester tin ordo di detencion di un Fiscal. Pero cu e cambio den ley, un Hues Comisario hunto cu ministerio di husticia por señala un area specifico, durante un dia y oranan specifico, den cual mester anuncia adelanta, cu polis tin e poder adicional pa listra un ciudadano, sin cu e ta un sospechoso. E accionnan aki tin como meta pa por logra kita mas arma y droga for di caya.

PAKICO SAN NICOLAS

E decision pa señala areanan pariba di brug como areanan di riesgo, a bin despues cu habitantenan di e areanan menciona a yama un reunion cu minister di husticia, ministerio publico y mando Policial pa vocifera nan preocupacion y formalmente a solicita pa extra ayudo y sosten pa frena e aumento di criminalidad den algun area specifico. Ey a bin afo cu tin algun mucha, menor di edad, cu ta haciendo bida di henter e area imposibel y a bira un peliger pa sociedad.