HOH: No mester a evacua pashentnan debi na holor di gas ayera

ORANJESTAD – Hospital Horacio Oduber (HOH) ta sigura cu diaranson anochi no mester a evacua pashentann debi na un holor di gas cu a surgi. Nan ta splica cu rond di 7.15pm a constata un holor di gas na piso 4 di e banda ya renoba di Hospital. Di biaha a bati alarma y team di calamidad di Hospital (HVT)  a tuma accion. Polis y Brandweer tambe a yega Hospital di biaha pa sigura cu tur cos ta bou di control. “HOH kier aclarea cu na ningun momento a evacua pashent mirando cu a tuma accion di biaha y nan siguridad no tabata den peliger”. 

TRABOU DI CONSTRUCCION

Actualmente tin trabounan di construccion andando na Hospital y ta pensa cu esey por a ocasiona e holor di gas. Brandweer a hasi e trabounan di control pa sigura cu no tin ningun lekkage. HOH kier sigura cu awo tur cos ta bou di control y e pashentnan y empleadonan ta safe.  Lo sigui di biaha un evaluacion di e sucedido y lo tuma accion si ta, y unda ta necesario.