Opinion: Tin inhusticia laboral na Aruba

(OPINION) 

Un grupo di trahador di sector priva a acerca nos redaccion cu un peticion pa publica nan frutracion pa cu e situacion laboral na Aruba. Nan ta cuminsa bisando cu nan a ripara cu 15 sindicato a uni y kier papia cu gobierno tocante di e 12,6 % cu trahadornan cu nan ta representa a entrega. Nos (grupo trahador) a bin tende cu algun di e sindicatonan aki cu ta representa trahadornan di companianan di Gobierno kier stop e entrega of condiciona of sera deal pa cu e entrega di nan salario. Nos como trahador tin comprencion pa cu e situacion ey, no ta agradabel pa gana menos mientras cu bo ta sigui traha normal y antes bo tabata gana mas. Pero ta aki e inhusticia labora ta cuminsa, trahadornan di gobierno y di e companianan estatal tin condicionnan hopi mas mihor cu sector priva. Nan ta gana tur sorto di beneficio y bonus cu nan ta cobra na miles. Pesey nos ta puntra nos mes si e sindicatonan mes no ta mira e inhusticia social laboral cu tin na Aruba. Boso no ta considera cu ketu bay nos ta den un pandemia mundial, nada ta sigur na ningun parti di mundo.Pesey nos ta pidi pa bin transparencia den kiko e sindicatonan di e companianan di gobierno y di gobierno mes ta pidiendo. Nos ta 5 trahador cu no tabata tin chens pa sera ningun deal, nos a wordo manda cas na comienso di luna di september pa motibo di e aumento di casonan di Covid na Aruba. Di un dia pa otro a bisa nos cu no tin trabao mas pasobra cu tin hopi cancelacion di turistanan y nos mester bay cas. Tres di nos tabata traha pa un uitzendburo den Horeca. Nos a wordo bisa cu lo yama nos pa nan bin traha ora cu tin suficiente guest y trabao atrobe. E cos aki ta hopi frustrante, nos tambe tin famia pa cria, nos tambe tin debe pa paga. Na Hulanda awor aki tin decenas di miles di vacatura, na Merca tambe, boso kier sa dicon? Wel nos ta kere cu aya nan tambe ta frustra cu e condicionnan laboral inhusto cu tin. No ta husto cu nos cu ta traha duro den sector di Turismo y Horeca, cual ta produci e entrada cu Aruba ta ricibi, ta esnan cu tin cu sufri y biba den inseguridad, boso ta pensa ta cu ki placa nos lo paga awa y coriente mayan, asina aki Aruba ta One Happy Island? Pesey nos ta pidi pa transparencia, pa Gobierno y Companianan di Gobierno publica loke nan kier negosha cu Gobierno, laga nan publica e Payroll tambe di e Companianan. Ta nos placa di belasting, di coriente y di awa ta paga, pueblo tin derecho di sa. Asina un grupo di trahador local y stranhero biba pa algun aña caba na Aruba a expresa, nan ta malcontento cu inhusticia laboral na Aruba. Awor nos tin cushina cuminda bende den weekend riba facebook pa nos gana un poco cen, no ta husto.