Consul-general nobo di Venezuela a yega Aruba

ORANJESTAD - Director interino di DBB (Dienst Buitenlandse Betrekkingen) sr. Edwin Abath a ricibi e consul-general Venezolano nobo pa Aruba sr. Mendoza na aeropuerto Reina Beatrix diahuebs ultimo. Sr. Abath a wordo compaña pa e vice-consul Venezolano na Aruba sra. Amabel Lugo. E consul anterior sr. Jesus Arias Fuenmayor ya pa casi un aña caba ta staciona na Costa Rica como embahador pa Venezuela.

Sr. Mendoza, kende a yega Aruba den compania di su señora, tabata traha na Caracas prome cu e bin Aruba y awor a wordo apunta pa bin traha na Aruba como consul-general. Prome cu el a bin Aruba sr.Mendoza tabata pa algun dia na Den Haag Hulanda pa haya su acreditacion como consul. Sr. Arias Fuenmayor tabatin un relacion hopi estrecho cu gobierno di Aruba, especialmente cu Prome Minister Eman y Minister Sevinger. Sr. Mendoza a splica cu e intencion tey pa sigui cu e bon relacion di hermandad aki. “Tin lazonan familiar aki na Aruba cu historicamente a keda manteni den forma estrecho. Na Den Haag nos a bisa cu pa nos esaki ta un oportunidad pa sigui profundisa e lazonan di amistrad cu semper ta contribui na un bon relacion cu henter e pueblo.” Na Hulanda sr. Mendoza a cera conoci tambe cu Minister Plenipotenciario sr. Alfonso Boekhoudt.

Mendoza a splica cu e historia cu Venezuela y Aruba ta comparti a tene e dos paisnan uni y su meta ta pa sigui profundisa mas ainda e relacion di union aki. Riba e pregunta ki dia e ta cuminsa traha el a contesta cu desde e momento cu el a yega Aruba, su trabou a cuminsa.

Na final e consul-general Mendoza a gradici Prome Minister Eman, director di e departamento di Relacionnan Exterior Abath pa tur loke a haci p’e, mescos tambe e consul interino sra. Amabel Lugo.