Na Corsou, CORC BV no ta interesa mas den operashon Refineria Isla sino uno di India

WILLEMSTAD - CORC BV a hala definitivamente atras for di e proseso pa bira futuro operadó di Refineria Isla. Esaki e kompania a informá Refineria di Kòrsou (RdK) durante un reunion djaluna mainta. E siguiente grupo ku tin na bista pa RdK “headhunt” ta Essar Oil & Gas Exploration & Production Ltd. di India. Asina EXTRA  a komprondé di fuentenan yegá na tantu CORC BV komo Konseho di Minister.

Ta trata di entre otro negoshi di krudo, energia, i heru. Minister Charles Cooper a hiba un kòmbersashon ku promé minister Gilmar ‘Pik’ Pisas djaluna mainta riba e desaroyonan rondó di e refineria i spesífikamente awor ku CORC BV no ta interesá mas.

Aparentemente Cooper ta é minister prinsipal ku Pisas komo representante di akshonista a delegá e outoridat pa atendé ku e refineria. Meskos ku Pisas ta delegá mas di e responsabilidatnan ku ta kai bou di su persona pa otronan, manera negosiashonnan riba e órgano di reforma COHO ku el a pone bou di minister di Finansa, Javier Silvania.

Mas aleu EXTRA a komprondé ku asta e proposishon a subi mesa, ku ta habri e kontrato ku CORC BV pa asina duna ESSAR posibilidat pa partisipá den e konsorsio. Pero esaki CORC BV no ta interesá den dje i konsekuentemente a tuma e desishon ku no ta interesá tampoko mas den operashon di e refineria.

CORC asta lo a informá su partner finansiero, di e último desaroyonan i duna banko instrukshon pa manda bèk e suma di algu ménos ku 1 miar dòler ku nan a depositá riba un “escrow account” komo “proof of funds” pa yega na un akuerdo pa operá e refineria.

ESSAR ta un di e kompanianan di mas grandi di India riba tereno di eksplorashon di karbon, gas i krudo na India. Tambe e kompania tin un pia den e sektor petrokímiko na Gran Bretania.

E ta operá un refineria na Inglatera i ta produsí kombustibel pa transporte públiko. Diferente otro kompania manera e eksportadó mas grandi di krudo na Rusia, Rosneft, Trafigura ku ta un kompania ku ta hasi negoshi den krudo i kombustibel (un asina yamá “commodity trader”) i UCP Investment Group na 2017 a atkerí Essar Oil pa un suma 12,9 bion dòler pa asina haña partisipashon den e merkado di konsumo di energia di mas kotisá na mundu ku ta India. NOTA: E texto ta scirbi den Papiamento fonetico di Corsou.