Pasaheronan cu drenta y sali di Aruba lo pasa screening di Interpol

ORANJESTAD -  Entrante 1 di November pasaheronan cu ta sali y drenta nos pais lo pasa den screening di INTERPOL, pues den caso cu un pasahero ta wordo sospecha, lo percura pa un investigacion mas extenso di e e pasahero. Esaki a keda presenta dialuna durante un conferencia di prensa local unda cu Interpol Aruba, minister di husticia Rocco Tjon y esnan cu a desaroya e programa aki. 

E proyecto aki ta uno cu lo wordo ehecuta bou di maneho di INTERPOL. Lo haci uso di e base di informacion di INTEPROL pa deteccion y ehecucion como tambe lo hiba un maneho preventivo den combati criminalidad. Tambe, lo duna sosten na autoridadnan cu ta maneha nos frontera den e ehecucion di e tareanan di supervision. Den cuadro di e proyecto aki, e siguiente departamentonan lo traha hunto; Departamento di Cuerpo Policial Airport, Interpol Aruba, Migracion Aruba, Koninklijke Marechaussee, Departamento di Seguridad Aruba, Ministerio Publico Aruba, Guarda Costa y Guarda nos Costa Aruba.

Conhuntamente cu Gamma IT Solutions, kende ta e compania encarga cu e sistema di RADEX cual ta e “Border Control Management System” cu ta liga na e sistema di Migracion Aruba, a logra pa haci e proyecto aki posibel. Pues, cu esaki, lo haya acceso di informacion necesario pa por identifica personanan cu por wordo sospecha di criminalidad. Lo logra haci trabou preventivo riba personanan indesea, tambe lo haya acceso na informacion necesario pa haci investigacion riba documentonan di identidad y di biahe. Por medio di e medidanan presenta, lo percura pa personanan indesea no logra drenta Aruba, y asina preveni y/of stroba actonan criminal.