Atracador arma riba empleado ta logra bay cu un suma considerabel

ORANJESTAD - Diabierna algo prome cu 5 or y mey, ta sosede un atraco arma riba un empleado di e compania Satex. Esaki a pasa riba e parkinglot di Aruba Bank den caya principal. E empleado na momento ey a bay baha pa deposita un suma basta grandi di placa na e nightdeposit di Aruba Bank. Eynan e la wordo sorpresa pa un atracador cu un pistol di airsoft den su man y cu meya tapa riba su cara. E atracador a dal e empleado un mokete riba su nanishi y a bay cu e suma grandi aki. E atracador a bay direccion panort. Mesora a pidi pa polis y ambulance, na yegada polis a papia cu e victima y personal di ambulance a trata e victima na e sitio. Despues ela wordo hiba oficina di recherché pa asina duna su declaracion. Atraco team, unidad di cacho y departamento technico a bay na e sitio. Slachtofferhulp a wordo pidi pa bay na oficina di recherché den Frankrijkstraat unda e victima a wordo hiba pa duna su declaracion. Segun e empleado a bisa na e sitio cu e atracador lo a bay cu un suma di mas o menos 400 mil florin.