CAft ta sugeri pa para ayudo di FASE prome cu fin di aña aki

ORANJESTAD – Gobierno di Aruba tin cu para tanto e ayudo di FASE como Loonsubsidie, prome cu e fin di e aña aki. Asina presidente di e colegio di supervision financiero CAft, Raymond Gradus a sugeri gobierno awe mainta, y a confirma esaki durante un conferencia di prensa. E motibo pa e declaracion ta e recuperacion positivo di e economia di e pais. Ta mustra cu turismo ta floreciendo y cu pa e proximo temporada halto, hotelnan ta yen. 

FASE

Un total di 2700 persona hende ta ricibiendo FASE ainda, y esaki tin cu stop segun Gradus. Pesey ta pidi pa para FASE riba termino mas cortico. Ta papia te hasta di haci esaki prome cu fin di aña ainda. E problema ta cu ora cu hende tin FASE, nan no ta bay traha y ta trece e situacion laboral den problema. Tin suficiente trabou y te hasta durante bishita di Gradus na varios instancia, a compronde cu tin te hasta escases di trahado. Mes momento a compronde y a sugeri pa practica re entrenamiento pa cierto trahadonan pa asina nan por wordo ubica otro caminda si ainda nan no tin trabou den nan tereno di specialisacion. Esaki sigur den tereno hotelero lo ta algo beneficioso.