RMR: No a papia di Aruba awe, y Corsou si a haya placa

DEN HAAG – Aruba no a haya placa (ainda), pero Corsou si. Awe mainta Rijksministerraad (RMR) a bay di acuerdo pa otorga Corsou 76 miyon florin como placa pa e di 7 tranche. Asina e minister plenipotenciario di Corsou a confirma despues di e reunion awe mainta na Den Haag. Contrario na e plan inicial, Aruba di otro banda, no a wordo trata, pasobra “Aruba ta den pleno negosacion ainda”, tabata reaccion di minister plenipotenciario di Aruba Guilfred Besaril na noticiacla awe mainta. “Por lo tanto e prestamo (di 7 tranche) pa Aruba no a wordo trata awe”. Ta ora cu tin un acuerdo of cu yega na un palabracion (of no), lo por dicidi riba e 'destino' di Aruba. Pa loke ta prome minister di Aruba Evelyn Wever Croes, su reaccion tambe tabata uno similar y cortico:” Nos ta bezig cu Hulanda!” tabata e unico reaccion. Esey kier men pues, cu Aruba ta sigui den negosacion ainda, prome cu RMR dicidi. Esey ta nifica tambe cu ainda Aruba no a haya e placa di Hulanda.