Productor di programa Hulandes ta bay papia cu polis di Corsou despues di ‘bululu’ cu su documentario a crea

DEN HAAG – E periodista y productor di programa Hulandes Ewout, esta Ewout Genemans ta bay tuma contacto cu polis na Corsou, despues cu e cuerpo a keda desapunta y a desaproba e documentario riba e cuerpo cu a keda presenta dialuna anochi na television Hulandes. Durante 42 minuut, Ewout ta mustra un imagen negativo di e isla, y con polis di e isla ta atende cu casonan di droga. E vocero di RTL cu ta e canal di television en cuestion, a confirma e accion di Genemans.  

E programa ta mustra e ‘banda scur di Corsou’. Segun polis di Corsou, Genemans a priminti di laga polis wak e programa prome cu lance na television. Esey no a sosode. Tambe, Genemans lo a traha e documentario bou di pretexto falso. 

Supuestamente polis di Corsou ta evaluando pa tuma paso legal contra e productor y presentador di e programa. 

Por corda con mas tempran tabatin henter un bululu na Corsou ora cu prensa local no tabata permiti cerca un entrada hudicial. Y esaki siendo cu tabatin un crew di prensa Hulandes cu si tabata permiti pa te hasta core den auto di polis y filma. Inicialmente supuestamente Marechaussee Real lo a huur hende pa traha un documentario riba combatimento di criminalidad. A resulta awor cu tabata trata di e crew di Genemans. Esaki a crea hopi rabia y malcontento cerca prensa di Corsou.