Security Team di Hilton Aruba Caribbean a completa nan certificacion di seguridad CLSO

PALM BEACH – Hilton Aruba Caribbean Resort & Casino recientemente a celebra su Safety & Security team pa completa y ricibi nan certificacion di Certified Lodging Security Officer [CLSO] for di American Hospitality & Lodging Educational Institute [AHLEI].

Durante e prome parti di e aña, shete di e miembronan di e Security Team a gradua di un programa, facilita pa EPI College. E programa aki a provee tips y tacticanan general di safety & security, como tambe informacion specifico riba hospitalidad cu guardianan di seguridad mester pa asina por brinda un servicio efectivo na propiedadnan hotelero.

E Lodging Security Officer Program a revisa un variacion di topico incluyendo ley y responsabilidadnan di un propiedad hotelero; Podernan legal y limitacionnan di un rol di guardia di seguridad; Actividadnan di seguridad di rutina y tactica manera patrolling, documentacion y investigacion; Respondiendo na incidentenan y emergencianan incluyendo traficacion humano, anti-terrorismo/señalnan di terorismo, active assailant, hostage situation, emergencia di tempo y desaster natural.

Adicionalmente, 9 miembro di e team di seguridad a gradua for di Tourism Security Reporting, durante lunanan di Augustus y September. Nan a exitosamente participa den tayernan specialisa diseña pa mehora nan skirbimento di raportahenan, specifico na turismo, facilita pa Luxcel Consulting VBA.

E obhetivo principal di e tayer tabata pa revisa e puntonan fundamental di seguridad, reportahe y pa brinda oportunidad pa mehora nan forma di comunicacion. Na final di e tayer, participantenan tabata tin un comprension mas amplio riba importancia di produci reportahe preciso dentro di industria di turismo di Aruba, skirbiendo descripcionnan di calidad den idioma cla demostrando nan dominio den redaccion coherente, hasta den situacionnan mas compleho.

Certificadonan a wordo presenta na e team por medio di General Manager, Vasco Baselli, y Director of Learning And Development, Angelique Croes.

Baselli a felicita e team riba nan siñamento continuo y tambe alaba nan focus den brinda servicio profesional na e bishitantenan di e resort. E tambe a reitera e resort su compromiso pa crecemento continuo y desaroyo personal. “Seguridad,” el a bisa, “ta un di e consideracionnan di mas grandi di esnan cu ta riba vacacion ora di bay escohe un destinacion, anto esaki ta duna Aruba un bentaha competitivo.”