Gobierno a dicidi pa paga SKOA suma di subsidionan atrasa

ORANJESTAD – Gobierno a dicidi pa paga SKOA (Stichting Katholiek Onderwijs Aruba) e suma cu ta pendiente mesora. E suma en cuestion ta monta na 500.000 florin. Esey ta un di e desisionnan cu recientemente conseho di minister a tuma pa logra reduci e debe financiero di e fundacion. Cu esey tambe ta yuda pa baha e ‘placa di school’ posiblemente tambe. E mandatario encarga cu school, Michelle Hooyboer Winklaar a confirma esaki na NoticiaCla.com awe mainta. E mandatario no a bay publico cu e informacion ainda pasobra e tabata wardando un contesta prome di parti di SKOA riba e asunto aki. Lesa e carta manda pa SKOA, aki)

ATRASA

Den e mesun reunion fecha 6 di februari 2015, a palabra cu lo paga tur otro atraso di subsidio, a base di e cuentanan annual cu keda entrega. Si resulta cu tin mas suma habri di subsidio cu mester paga, lo cumpli cu e pago aki tambe. Loke tambe ta resalta, ta cu entrante 2015, gobierno lo asumi e gastonan di e ‘werksternan’, y lo haci esaki den forma di extra subsidie tambe. Cu esaki gobierno ta spera cu SKOA atende cu e sumanan menciona y posiblemente adapta esaki conforme necesario.

KITA WERKSTERNAN

E noticia cu a keda circula tambe cu lo kier kita e werksternan y reemplaza nan cu un compania di limpiesa, no ta corecto segun e mandatario a splica NoticiaCla.com. Berdad cu a pidi pa haci un investigacion pa mira si ora cu werksternan baha cu pensioen, pa no remplasa nan cu otro werksternan sino mas bien laga compania di limpiesa haci esaki. Sinembargo Hooyboer a informa cu e la haya como contesta, cu e suma lo no cambia, pues no ta consehabel. Pues ningun momento a bisa cu kier kita werksternan actual for di trabou, pa reemplaza nan cu un compania di limpiesa.NOTA. Foto adhunto ta di archivo riba dia 6 di februari 2015 cu a protesta dilanti di SKOA pa e asunto di 'schoolgeld'.