ORANJESTAD – Cosecha su tiendanan na Oranjestad y San Nicolas lo cera te proximo aviso. Lastimamente e consequencianan economico di COVID-19 a pone cu mester a tuma e decision pa cera e kiosko na cruiseschip terminal den 2020 y awor a tuma e decision conforme practica di ‘good governance’ pa cera e portanan di e tiendanan di Cosecha na Oranjestad y San Nicolas te cu proximo aviso. E prioridadnan di directiva tabata pa personal por cera nan periodo na Cosecha dignamente y claramente pa cera tur cuenta na un manera responsabel.
Sinembargo lo sigui brinda cursonan si na Zoutmanstraat 1, cual opcionnan por keda wordo mira riba Cosecha su Facebook page y unda contacto por wordo tuma pa brinda curso nobo.
Aunke e noticia ta uno cu ta desapunta e gremio cu a wordo sirbi, Cosecha como tienda ta cera seis aña cu logronan importante pa artesania di Aruba, parti di Aruba su industria creativo, p’esey ta duna un danki di curason na tur artesano y artista cu a forma parti di Cosecha, tur cu ta of a traha den pasado na e tiendanan semper cu entusiasmo, nan ‘founding employee’ Talitha Schouten trahando Cosecha for di comienso y e tremendo gerencia, esta directora Joanne Dirksz y manager Soraida Wever. Tambe un danki na prensa di Aruba pa su aporte continuo y A.P.A. pa e subsidio brinda prome cu e pandemia. E team saliente di Cosecha ta orguyoso di nos talentonan local, un network special, y lo kier keda wak mas desaroyo den e industria aki. Un mensahe na tur artesano y artista pa sigui traha bunita arte y artesania y pa sinti orguyoso. Ta spera di a haci un impacto positivo riba tur cu a traha cu Cosecha y tambe na comunidad di Aruba.
Durante 6 aña e team di Cosecha y directiva di Fundacion C.R.A.F.T. a traha duro pa pusha artesania di Aruba. A logra habri 3 tienda caminda por admira y cumpra piesanan di Aruba su artista y artesanonan cu SEYO. E turista como tambe nos localnan mas y mas a haya nan caminda pa un di Cosecha su localidadnan.
Cosecha a habri na 2015 despues di investigacion, dialogo y organizacion extenso, algun aña caba procedente di Departamento di Cultura Aruba, ora a constata cu e artesania traha na Aruba tabata mester un plataforma prominente pa contra-aresta e desaroyo di e souvenir masal importa, cu aparte di tin e nomber di Aruba scirbi riba dje, no tabata distingi Aruba di niun otro isla den Caribe. Fundacion Centro pa Reenforsa Artesania y Forma Talento, esta C.R.A.F.T., a ser funda y di eynan Cosecha por a wordo estableci, cuminsando cu 25 artesano y artista, den e bunita monumento na Zoutmanstraat 1, renoba na 2014 special destina pa ta un centro artesanal. Na 2021 a cera cu alrededor di 125 artista y artesano trahando cu Cosecha, subrayando tambe e relacion estrecho cu Departamento di Cultura cu ta maneha e loket di Seyo Nacional di Artesania.
Aparte di e prome tienda na Playa, dia 26 di november 2016 Cosecha San Nicolas a habri su portanan. Un espacio hopi amplio y cu bon vibra, na unda e meta pa duna workshop bou guia di artesanonan y artistanan a bira realidad. Den 2019 a sigui otro expansion y a habri un kiosko pafor di e cruiseship terminal. Aki e turista a haya guia con pa e yega na e otro tiendanan como tambe haya informacion di Aruba y tayernan di artista y artesanonan.
A duna un variedad di workshop na Cosecha San Nicolas y Cosecha Oranjestad hunto cu diferente artista y artesanonan local y international. A traha tambe cu varios festival y tambe a organiza eventonan manera “Under the stars”, “Experience San Nicolas” ( conhuntamente cu FMA), cu hotelnan y mucho mas.
Cosecha a yama 4231 cursista bonbini cu a intercambia cu artista y artesano of a bin conoce e centro creativo durante un session informativo desde 2017 pa 2021. Tambe Cosecha a haya reconocimento di Aruba Quality Seal, Aruba Health & Happiness Code & Tripadvisor Award. A incentiva e produccion di producto nobo pa Aruba pa medio di e ‘IT Challenge’ na 2020. E estimulo di e tienda di artesania a percura pa por lo menos 13 artesano crece y bira entrepreneur independiente. A ofrece un gran necesidad den e ‘menu’ turistico, esta e experiencia autentico Arubano. A ricibi varios, bloggers, vloggers, prensa local como tambe internacional.
ORANJESTAD – Recientemente e team di Wings of Hope (WOH) cu ta forma parti di Aruba Airport Authority N.V. a organisa e di dos AUA Airport Runway Run riba diadomingo 17 di maart 2024, caminda un total di 125 coredo a duna bek na comunidad di un manera inolvidabel.
ORANJESTAD - Dia 18 di maart Aruba henter ta celebra Dia di Himno y Bandera. Dos simbolo di nos autonomia, identidad, libertad y union.
ORANJESTAD - Fundacion Kapel di Bethania – FKB, ta habri portanan di Klooster Imeldahof pa henter pueblo di Aruba riba ‘Dia di Himno y Bandera’ 18 di maart for di 9:00 am pa 2:00 pm. Un y tur lo tin e posibilidad pa haya experencianan varia riba e dia di celebracion aki.
ORANJESTAD - Hilton Aruba Caribbean Resort & Casino a introduci e Tree of Giving na 2020 manera un forma pa duna bek na comunidad. Bishitantenan por contribui n’e Tree of Giving situa den e lobby di Aruba tower, pa medio di cumpra un poinsettia plant durante e luna di december. Tur e ganashi colecta ta bay directamente pa asisti e isla su banco di cuminda, FPNC, Fundacion Pa Nos Comunidad, www.fpncaruba.com.
ORANJESTAD - Señora Nena a nace na 1936 na Colombia bao di e nomber di Edith Elvira Fawcet.