Stichting Ambiente Feliz ta un fundacion cu curason

Stichting Ambiente Feliz ta un fundacion cu curason

Posted on 10/22/2021 11:25 am AST | Updated on 10/22/2021 11:27 am AST

ORANJESTAD - Un fundacion cu curason ta consisti di trahado cu tin pasion pa nan trabou. Trahado cu ta yena cu energia y ta inspira otro. Cu ta dedica na nan trabou y e clientenan.    Awe e fundacion kier presenta 3 persona cu pasion pa nan trabou y cu amplio experiencia, cu kier comparti kico e trabou ta significa pa nan, pa e calidad di cuido di e cliente y con comunidad di Aruba por aporta. 

Jurybeth Kock-Rijke ta traha como koki na Stichting Ambiente Feliz desde 4 di januari 2015.

Kico e trabou di koki ta significa pa bo na Ambiente Feliz?

"E trabou di koki na Ambiente Feliz ta significa pami, sin mucho palabra, un manera di expresa mi amor pa mi clientenan riba un tayo den forma di un cuminda cu ta haci mi clientenan contento.

Tur mainta na momento cu mi ta sirbi e desayuno, manera nan scucha e zonido di e garoshi, nan sa cu nan ta bay come. Nan manera di expresa nan mes ora nan wak mi pasa cu e garoshi ta yena mi curason cu alegria y ta pone mi corda kico ta e proposito di mi funcion. Cu un grito di alegria y cu un caluroso bon dia mi ta cuminsa mi dia di trabou na Ambiente Feliz". 

Con abo, den bo funcion, ta yuda duna contenido na calidad di cuido?

"Mi ta kere cu mi funcion ta hunga un parti hopi importante den e bida di cada cliente. Cada cliente ta diferente y cada uno tin su reto. Mi meta ta pa cada cliente ricibi nan cuminda personalisa a base di su necesidad na bienestar di su salud". 

Con abo ta wak e cuido pa persona cu limitacion intelectual na Aruba y con comunidad por aporta na esaki?

"Mi lo djis bisa esaki. Duna persona cu limitacion intelectual un chens y bo lo keda sorprendi di e capacidad cu e personanan aki tin. Nan ta personanan cu por hopi, pero hopi biaha no ta ricibi e oportunidad pa participa, socialisa of otro. Tin esnan cu ainda ta wordo poni un banda pasobra nan tin un limitacion. Esaki ta algo di lamenta.  Aruba, ban duna e persona cu limitacion intelectual mas atencion y mas oportunidad. Nos por!".

Mathilda Werleman ta traha como huishoudelijk medewerker desde 1 di mei 1996 Ambiente Feliz. 

Kico e trabou di huishoudelijk medewerker ta significa pa bo na Ambiente Feliz? 

"Pa mi un cas semper mester ta limpi. Particularmente ora bo ta traha cu persona cu ta rekeri cuido y guia. Ta importante pa preveni contagio di malesa. Un bon higiena ta promove un bon salud. Mi tin mas cu 25 aña ta eherce mi trabou cu hopi gusto. E trabou a siña mi hopi. No solamente ariba e tereno di limpiesa, pero tambe con pa guia e clientenan y traha den un team". 

Con abo, den bo funcion, ta yuda duna contenido na calidad di cuido?

"Como profesional mi ta aporta na e bienestar di cada un cliente. Calidad di cuido ta bay man den man cu higiena. Mi ta forma parti di un team cu ta traha duro tur dia pa crea un ambiente feliz den cas. Na momento cu un persona bishita Ambiente Feliz na Santa Cruz e ta duna mi un satisfaccion di mira un sonrisa ariba e cara di e otro persona pasobra e cas ta limpi. Esey ta yena mi cu felicidad y ta un reconocemento di e importancia di mi trabou". 

Con abo ta wak e cuido pa persona cu limitacion mental na Aruba y con comunidad por aporta na esaki?

"Mi ta sinti cu na Aruba ainda tin un tabu grandi pa locual ta persona cu limitacion. Ami ta considera tur persona cu limitacion como un ser humano cu tambe tin derecho di participa. Comunidad mester habri nan curason pa nan. Acepta cu nan tambe por forma parti di nos comunidad. Nan por hopi mas di locual nos ta pensa. Ban duna nan un oportunidad pa desaroya y participa". 

Lorena Lampe ta traha como woonbegeleider desde 1 December 1996 na Stichting Ambiente Feliz.

Kico e trabou di woonbegeleider ta significa pa bo na Ambiente Feliz?

"Den mi trabou como woonbegeleider mi a siña kico e ta significa pa traha cu persona cu limitacion intelectual. Mi a siña con pa reconoce nan necesidad y traha hunto ariba e bienestar di e cliente. Mi a siña cu no tur hende ta comunica igual y ta importante pa tuma tempo pa scucha otro. Mi a logra crea un relacion duradero cu e clientenan basa ariba confiansa y respet pa otro. Esaki ta facilita mi persona pa duna un bon guia y traha ariba mehoracion di nan calidad di bida". 

Con abo, den bo funcion, ta yuda duna contenido na e calidad di cuido?

"Na prome lugar mi ta acepta cada cliente manera nan ta. Cada un cliente ta unico. Mi ta respeta nan derecho como ser humano y mi ta percura pa nan cuido ta adecua. Nos ta enfoca ariba un bon cuido medico y bon alimentacion. Nos ta organisa tambe varios actividad na unda nos clientenan por pasa momentonan agradabel.  E clientenan ta gusta pinta, traha obra di man, baila y canta y mucho mas. E dianan di fiesta semper ta wordo celebra na grandi". 

Con a bo ta wak e cuido pa persona cu limitacion mental na Aruba y con comunidad por aporta na esaki?

"E cuido pa cu personanan cu limitacion intelectual na Aruba ta basta bon, pero e por ta miho. Na Aruba no tin suficiente instancia pa brinda cuido na persona cu limitacion. E lista di espera ta hopi largo y tin biaha no tin e cuido rekeri tampoco. E subsidio cu un fundacion manera Ambiente Feliz ta ricibi no ta suficiente. Pa por realisa mantencion, cierto actividad of otro e fundacion ta depende di donacion. Gobierno y comunidad di Aruba mester ta consciente cu “Hey, nan tambe tey”. Si tur hende duna un man, sea por medio di un donacion, trabou boluntario of otro, nos por logra hopi y realisa un mihor cuido pa esnan mas vulnerabel den nos comunidad".

  • Encuesta di noticiacla cu resultado interesante riba recorte di salario 12.6%

    Encuesta di noticiacla cu resultado interesante riba recorte di salario 12.6%

    ORANJESTAD – Tin un division entre trahadonan di sector publico na Aruba cu a participa na e reciente encuesta di NOTICIACLA, riba e recorte salarial di 12.6%. Siman pasa NOTICIACLA a presenta un encuesta basa riba e tema aki, y a resulta cu di esnan cu a participa, 46% kier pa gobierno continua cu e recorte, mientras cu 54% kier pa gobierno para cu esaki mesora. Ademas, di esnan cu a perde trabou debi na e pandemia, 48% ainda ta sin trabou. Un total di 347 persona a participa na e encuesta digital aki. 

  • WVI: Ta basta! Termina e retencion di 12.6% per direct

    WVI: Ta basta! Termina e retencion di 12.6% per direct

    ORANJESTAD – E directiva general di VWI-Vereniging van Werknemers met een Individuele Arbeidsovereenkomst in dienst van de Water- en Energiebedrijf Aruba (W.E.B.) N.V. VWI su miembronan a laga sadialuna, den un forma ‘cla y raspa’ cu nan ta cansa y fada di e abuso di recorte salarial di 12.6%. Den un comunicado nan mensahe tabata cla, y no a aprecia e contesta di gobierno den fin di siman riba e tema. 

  • Aruba a registra 18 caso positivo nobo di Covid19

    Aruba a registra 18 caso positivo nobo di Covid19

    ORANJESTAD - Segun resumen di awe  21 persona a recupera y un total di 18 caso nobo di COVID-19 a keda registra di cual 10 ta no-residente. E cifranan aki ta representa un 'Positivity rate' bou di nos residentenan di 15%. E cantidad di casonan activo di COVID-19 pa awe ta 181 y cantidad di fayecidonan relaciona cu COVID-19 ta 174. Datos ta ilustra casonan nobo di COVID cu un average semanal di 18 caso pa dia y un averahe di 'positivity rate' semanal di 11% pa dia.  Actualmente na Aruba tin 7 persona interna debi na COVID di cual den ICU tin 4 persona y riba piso general tin 3. Na Colombia tin actualmente 9 persona den  ICU y 3 riba piso general.

  • Sindicatonan ta reuni dialuna mainta pa dicidi siguiente paso

    Sindicatonan ta reuni dialuna mainta pa dicidi siguiente paso

    ORANJESTAD – E bloke di entre 12 pa 15 sindicatonan bringando pa gobierno para e recorte salarial di 12.6% ta reuni dialuna mainta pa dicidi nan proximo paso. Asina presidente di sindidato SIMAR Josephine Albertus a bisa noticiacla diadomingo. Nan a ricibi e contesta di gobierno di Aruba diabierna y awor ta dicidi kico ta pasa dialuna mainta. Mientrastanto e sindicato SIMAR mes a yama un reunion cu tur nan miembro y no miembro pa diamars mainta tempran na SIMAR pa papia riba e tema. No ta descarta un paro nacional sea e siman aki of otro siman si gobierno no para e recorte. Gobierno a bisa cu esey no ta un opcion, pues palabra awor ta keda na sindicatonan. Gobierno, anticipando e siguiente paso, a urgi sindicatonan pa no bay den una paro nacional sino pa reconsidera nan punto. 

  • No lubida di participa na encuesta di noticiacla riba situacion laboral na Aruba relaciona cu pandemia

    No lubida di participa na encuesta di noticiacla riba situacion laboral na Aruba relaciona cu pandemia

    ORANJESTAD – No lubida di participa na encuesta di noticiacla riba situacion laboral na Aruba relaciona cu pandemia. Manera nos a raporta caba e siman aki, mientras cu Aruba ta sigui afecta pa e pandemia di Covid19, nos situacion laboral no ta diferente. Mes momento nos ta conciente cu esaki por ta diferente sinembargo pa hopi hende, dependiendo di bo trabou, sector laboral y situacion personal. Noticiacla pa medio di e siguiente encuesta ta interesa con bo situacion actual ta, sea ta como un trahado di sector publico of priva. Manera semper, e resultado lo wordo usa pa metanan netamente noticioso. Bo participacion ta wordo aprecia manera semper. Despues di algun dia di encuesta, e resultado lo keda presenta den un edicion di noticiacla. Esaki ta un encuesta solamente pa personanan residencia na Aruba di 18 aña pariba. No lubida di participa y pa haci esey, djis click AKI.

  • AHATA Excellence Awards a honra 38 empleado sobresaliente pa nan dedicacion

    AHATA Excellence Awards a honra 38 empleado sobresaliente pa nan dedicacion

    ORANJESTAD - Durante un evento elegante atendi pa 150 persona, Aruba Hotel & Tourism Association a celebra e empleadonan altamente motiva cu ta sostene nos industria di turismo. Cada compania miembro a selecciona un empleado cu a personifica esfuerso extraordinario y servicio excelente den 2021. Trintiocho (38) persona a ricibi nan certificado y un premio di CEO y Presidente di AHATA, Tisa LaSorte, durante e evento. Minister di Turismo y Salubridad Publico, Mr. Dangui Oduber, Minister di Labor y Integracion, Mr. Glenbert Croes, Hunta di AHATA, y coleganan tabata presente na Hyatt Regency Aruba pa gradici y felicita e honradonan. 

  • Powered by SETAR