ORANJESTAD – Ex minister Paul Croes a dicidi cu ta bay Corte di Casacion. Asina e la declara awe diahuebs na prensa despues cu a trata e caso di confiscacion. Segun e ex mandatario, a evalua basta fuerte den seno familiar riba e resultado di e caso penal Ibis recientemente, tambe cu abogadonan y a dicidi cu ta apela esaki mas leu. Primordialmente pasobra no ta di acuerdo cu e proceso con esaki a wordo trata. Tabatin actonan illegal di parti di Procurador General y Ministerio Publico den e caso aki segun e ex mandatario. E ta mustra cu ley na Aruba ta bisa hopi cla cu e unico persona cu por persigui un minister den funcion, ta e PG. Fiscal of Ministerio Publico no por hacie esaki riba su mes. Segun Croes, nan (su ekipo legal) no a haya e asina yama ‘bijzondere aanwijzing’ of aprobacion firma di PG den e dossier den caso Ibis. Loke a haya ta un carta no firma na Hof, cu ta apodera Ministerio Publico pa persigui e mandatario, locual ta haci cu e carta e ora no tin validez. Ademas, segun e ex mandadatario, e carta tabata fecha despues cu e caso a cuminsa. Segun e ex mandatario, e ta yama esaki ‘te gek voor woorden’, y ta considera esaki un di e foutnan procedural. Ora cu un fiscal actua riba su mes, e ta actua illegalmente segun e ex mandatario.
CPT
E ex mandatario a papia tambe di e tempo cu e tabata minister y tabata traha rapport pa UN pa Aruba riba tratamento di prisoner na Aruba cu ta parti di e asina yama European Committee for the Prevention of Torture and Inhuman or Degrading Treatment or Punishment (CPT). Den e caso di Ibis, e mes a experencia e maltrato (refiriendo na e 80 dia cu e la keda den isolacion), y esaki ta cay den liña di tortura. Hof ,- segun e ex mandatario, - no a duna esaki atencion debido, cu na Hulanda lo no a pasa nunca. Segun e ex mandatario, un persona cu paspoort Hulandes no por pasa algo asina nunca mas. Como tal e ex mandatario ta bay bringa esaki tambe den Corte Europeo, debi cu a trapa derecho humano di su persona. E professor cu lo conseha e ex mandatario ta Stijn Franken den e caso aki. No ta conoci ki tempo e caso aki lo tuma lugar awor.
ORANJESTAD – Corte Superior otro siman dialuna ta inicia e caso di Avestruz, cu scuchamento di testigo. Mas informacion a bira conoci diamars di kico tur lo sosode specificamente e proximo dos simanan, cu Corte Superior tin reserva pa e caso. E caso mes lo cuminsa dialuna pa 9’or di mainta dialuna 13 di mei. Lo scucha 4 testigo entre 13 y 14 di mei (tin mas pero nan a wordo scucha caba pa Huez Comisario). Despues ta sigui dia 15, 16, y 17 cu repaso di e dossiernan y circumstancia personal di cada sospechoso.
WILLEMSTAD – Dialuna ultimo Hof a celebra su di 155 aña di existencia. Oficialmente sinembargo e fecha ta 1 di mei, pero a dicidi pa combina e celebracion di e dia di liberacion. Den cuadro di esaki, tur establecimento di Hof riba tur e respectivo islanan a ofrece coleganan un almuerzo, prepara pa Koninkrijksbrede Freedom Meals. E almuerzo no solamente a simbolisa e union den Reino, pero tambe e apreciacion intenso pa e diversidad y forza di nos comunidadnan di tur e 6 islanan cu ta cay bou di Hof. Prome cu e almuerzo, Allan van der Ree di WWII Museum Curaçao a tene un lectura na Corsou, y na Aruba e lectura a keda presenta pa Luc Alofs, antropologo cultural. Como parti di e celebracion, Hof a comparti un video cu e mensahe di e presidente di Corte Comun di Husticia, Mauritsz de Kort. Pa wak e mensahe, click AKI.
ORANJESTAD – Corte di apelacion a reserva dos siman di luna di mei 2024 pa trata e apelacionan di caso Avestruz. Specificamente lo tin tres huez pa scucha y trata e 7 sospechosonan. Noticiacla a compronde cu e caso ta cuminsa pa 8:30am tur dia y caba 5’or di atardi. Ta trata di e sospechosonan Benny Sevinger, Pieter Sussebeek, Carlo Mansur Jr, Maria Leoncita Arends, Ninuska Nuñez, Edgar (Gabby) Werleman y Curt Harms. Tur sea a apela parti di nan sentencia den e prome caso, of Ministerio Publico a apela nan sentencia. Specificamente, cuater sospechoso a apela parti di nan sentencia mientras cu Ministerio Publico a apela sentencia di tres sospechoso. E hecho cu tin dos siman reserva, no kier kier men cu tur dia lo tin caso, ya cu hueznan por programa algo durante e prome dianan y dicidi eynan, con ta usa e dos simanan mas optimalmente.
ORANJESTAD – Corte di apelacion a mantene e sentencia original di expropiacion di ex minister Paul Croes diahuebs como parti di e caso Ibis, cu un cambio si. Envez di paga AWG 183.489,10 bek, e ta haya un reduccion di 20 mil. Pues e mester paga e suma di AWG 163.489,10 mil florin, of sinta un castigo di prison di 18 luna extra di loke e ta sintando aworaki caba. No ta conoci si Croes lo apela, y e abogado Desiree Croes lo a comunica y delibera cu su cliente mas laat awe riba esaki.