Crisis Team y SMAC ta aproba prome fiesta bailabel pa Aruba

ORANJESTAD – Crisis Team y SMAC a aproba pa e prome fiesta bailable tuma lugar despues di un aña y mei debi na e pandemia y ta tuma lugar dia 13 di november proximo. Ta trata di un fiesta den ballroom pa 250 pareha cu mester ta sea vacuna of por a presenta un test negativo di covid19 na entrada. Manera ta conoci, pa mas di un aña y mei a prohibi tur fiesta bailabel debi na e pandemia y no tabatin oportunidad mas pa balia. Como tal awor a dicidi pa haci un fiesta di prueba, cu bista riba carnaval, completo cu banda live y manera e nomber ta bisa, por balia. E portal aki a compronde cu esaki ta den tono carnavalesco, mirando e cercania di e fecha di 11-11, cu ta e inicio di e temporada di Carnaval. Di otro banda, a compronde cu mirando cu no a tene actividad carnavalesco e aña aki pero si a haci apertura di carnaval aña pasa, e apertura ey ainda ta vigente.