Na Corsou e ‘Smart Bus Stop” ta un realidad

WILLEMSTAD - Ayera ITS Caribbean & Latin America a lansá e promé “Smart Bus Stop” aki na Kòrsou. E  “Smart Bus Stop” ta hasi biahamentu ku transporte públiko aun mas agradabel.

E “Smart Bus Stop” ta disponé di e aplikashon di Autobusbedrijf  Curaçao (ABC) ku ta fasilitá e usuario ku orarionan i tur informashon nesesario tokante e rutanan di  ABC i tambe e posibilidat pa plania un ruta.

Na e Smart Bus Stop aki, e usuario por disfrutá di “background music”, internet grátis, espasio pa karga telefòn i e karakterístikanan di seguridat manera un boton di pániko, sufisiente iluminashon anochi i tambe kámara di seguridat.

Aparte di e konfortabilidat i sentido di seguridat ku e parada ta ofresé e “Smart Bus Stop” aki ta diseñá pa ta un “Super Smart City Sensor” ku lo keda uza pa kolektá diferente tipo di informashon. Manera análisis di tráfiko; e ta konta kantidat i monitoriá vehíkulonan i peatonnan; e ta detektá velosidat; rekonosé plachi di number; e ta midi impakto di vehíkulonan grandi riba kaya i tambe polushon, informashon di e kalidat di airu.

Den kaso di emergensia e parada i tur su ekiponan ta ekipá ku “vibration i shock sensor” ku ta komuniká “real time” ku plataforma di ITS.  E alarma ta keda aktivá mesora for di distansia en espera di outoridatnan.

Henter e parada ta trahá ku “solar panels” ku un sistema solar diseñá spesialmente pa e parada i tambe e planta di koriente nashonal pa sòru pa backup i tambe e pantayanan digital.

Ku introdukshon di e promé “Smart Bus Stop” aki, ta e inisio di e plan pa desaroyá infrastruktura “Smart” aki na Kòrsou i alabes uza Kòrsou komo e modelo prinsipal pa e próksimo proyektonan di “Smart City”. NOTA: E texto ta scirbi den Papiamento fonetico di Corsou.