ODUBER: Cunukeronan local no ta bon informa di relato di biahe di Santo Domingo

ORANJESTAD – Falta di informacion a pone cu cunukeronan a reacciona negativo contra e bishita di minister Otmar Oduber pa Republica Dominicana. E mandatario a reacciona awe tardi pa NoticiaCla.com y mustra cu e ta kere cu sr Nuñez , - un empleado di e compania Landfarm-, cu ta e vocero di e grupo di cunukero no a sigui e conferencia di prensa duna. E ta bisa esey pasobra segun Oduber, den e conferencia claramente a wordo treci dilanti kico exactamente ta bay sosode y kico tur a wordo trata.

99% IMPORTA

E mandatario a bisa na tal ocacion cu 99% di fruta y berdura ta wordo importa pa Aruba y 1% ta wordo produci riba nos isla. Como tal a trata na Santo Domingo con tin cu haci cu pa 2020 na Aruba, un total di 15% di e consumo di fruta y berdura, por wordo produci na Aruba mes. “Den e cuadro aki nos a papia tambe, y papia cu e agricultornan pa haya nan experticio den tambe material disponibel pa un prijs cu ta cumbini e agricultornan na Aruba manera drip system y otro tipo di material na miho prijs.

PROGRAMA FISCAL

E mandatario ta conciente cu awa ta un problema y tambe lo traha riba esey. Ademas ta trahando riba un programa fiscal pa asina baha impuesto riba material pa agricultura y cria y pesca. E idea ta pa haci esaki liber di impuesto. Un programa cu ta existi pa 2 aña caba. Sinembargo hopi no ta haci uso di e cambio di ley aki debi cu bo mester ta inscribi na camara di comercio. Esey ta pone cu hende ta perde un chens ya cu nan no kier haci esaki pa miedo di belasting.