Cantautor Arubano MTCHLL ta lansa su single titula 'Lag'e Sosode'

Cantautor Arubano MTCHLL ta lansa su single titula 'Lag'e Sosode'

Posted on 10/19/2021 3:27 pm AST | Updated on 10/19/2021 3:29 pm AST

ORANJESTAD  - Lag'e Sosode ta un cancion cu un mensahe hopi positivo. E inspiracion a sali for di frustracion di bida, ora cu nos ta sinti cu tur cos ta bai robes y cu nada no ta na nos favor. Hopi ta perde motivacion y ta laga e negativismo podera di nos pensamentonan y esey ta horta nos paz mental. Manera e titulo mes ta bisa, nos tin cu "Lag'e Sosode" (bida), no preocupa demaciado y forza pa ta den control di tur cos tur ora. Confia cu bo plan perfecto ya ta scirbi y cu nunca esaki no ta exclui sacrificio. Hopi biaha nos tin cu pasa den cosnan menos agradabel pa nos sinja di nan y asina bira mihor ser humanonan.

Cocolishi Studio a keda encarga cu e video clip. Un video cu ta toca ariba temanan cu awendia ainda ta poco taboo den nos comunidad manera soledad den nos grandinan, acceptacion di e comunidad LGBTQ+ y tambe mayornan cu ta sacrifica tur cos pa nan yiunan. Asina a hinca un storyline den otro cu ta hopi conmovedor.

Letra y melodia a keda den man di MTCHLL y e production y instrumentalisacion den man di Chris Kross y Siegfried Hart. E cancion ta fruto di un colaboracion entre MTCHLL y Krosshart. Hunto nan tin un EP na caminda cu lo consisti di 6 cancion. Spera esaki den November venidero.

Ta extende palabranan di gratutid na un y tur cu a participa den e video clip tanto dilanti como patras di camara.

Tambe ta gradici Prins Bernhard Cultuurfonds Caribisch Gebied grandemente, kendenan a patrosina gran mayoria di e EP.

  • Powered by SETAR