Na Corsou demanda 14 aña prison contra trio policial pa ladronicia

WILLEMSTAD - Fiskal a pidi un kastigu total di 14 aña kontra di tres agente polisial pa akto di ladronisia, mal uso di nan poder, i falsifikashon di prosèsverbal. Ta trata dje agentenan polisial Overman, Tomsjansen, esun femenina Dorand. E tres agentenan polisial aki ta for di e grupo di seis ku dia 6 òktober tabata den korte pa mesun akto ariba proba. E tresnan ku a basha bou promé den e kaso aki, nan kaso a keda trata kompletamente dia 6 di òktober, i ayera tabata dia pa fiskal pidi kastigu pa e tres sobra nan. E tres akusadonan aki ta ser konsiderá esnan ku ta bini ku plan pa drenta den seis (6) kas, kaminda nan sa ku tin bendementu di droga i ku tin bastante sèn kèsh presente.

Nan a hasi nan mes kulpabel pa e echonan proba riba dos dia, esta den anochi di 16 pa 17 di sèptèmber i 17 pa 18 sèptèmber 2020. Nan a drenta na seis adrès en buska di droga i plaka.

Di akuerdo ku fiskal for di 6 òktober ku a trata e kaso por a mira ku loke a bin dilanti a shòk komunidat. Mas aleu fiskal a bisa ku ora e echo a bira konosí, e akusadonan a bira rondó dje echonan; nan a tira falta riba otro; nan a gaña den prosèsverbal.

“Un grupo di ámtenar ku mester duna ehèmpel, a hasi aktonan kastigabel i ainda nan no tin esaki bon dor. Pasombra nan ta bisa ku e úniko kos robes ku nan a hasi ta di kue e sèn, i keda kuné. No ta bai pa redada de kas, pero kibra privasidat di hende su kas, no ta bai pa konfiská pero kometé ladronisia”, fiskal a bisa.

E polisnan aki a hasi fayo grave. Danki na Kuerpo Polisial ku a sa di hasi investigashon i ku awe e akusadonan ta para den korte.

E ‘modus operandi’ di e grupo polisial aki tabata di bai adrèsnan ku antesedentenan penal, esta adrèsnan ku ta konosí ku ta bende droga i ku lo ti hopi plaka. Apesar ku e akusadonan ta para riba ku ta den un anochi so, esta 18 di sèptèmber 2020, nan a kometé e echonan, fiskal ta para riba ku ta dos anochi, esta 17 i 18 di sèptèmber, kaminda nan a bishita respektivamente 2 i 4 adrès den anochinan menshoná. For di e promé dia ku nan a parti plaka nan tabata sa ku nan a hasi robes.

Dia 16 di mart di e aña aki e agente Tomsjansen a papia su boka voorbij. Pasombra el a bisa ku nan a papia i algun di nan den e grupo di 6 agente polisial tabatin problema finansiero. P’esei a bin ku a plan pa bai na kas di hendenan ku ta bende droga i tin sèn. Ta despues Tomsjansen a ripara ku te so a duna tal deklarashon, el a kambia esaki.

Pa tapa nan echonan despues ku un dje siudadano a bèl ‘meldkamer’, e ora ei nan a kore traha prosèsverbal tur brua den otro di e adrèsnan Sto. Domingoweg i Daimarieweg. Nan a brua tur kos den otro. Ademas ta e dos adrès aki so nan a indiká di a tene ‘inval’, miéntras nan a bai na 4 otro adrès mas, pero no a skirbi nada.

Fiskal a pidi korte pa kondena Dorand na 4 aña di kual 1 aña kondishonal i guia di Reclassering. Tambe prohibishon pa ehersé e trabou di polis pa 8 aña i pa e dos otro agentenan Tomsjansen i Overman pa kada un ta 5 aña i 10 aña prohibishon pa ta ser agente polisial. NOTA: Texto ta scirbi den Papiamento fonetico di Corsou.