Lotto contento cu presentacion atleta Renze Postma den e Duathlon na Colombia

BARRANQUILLA - Lama bruto a stroba cu e 2015 CAMTRI Barranquilla Triathlon America Cup y CAC no por a continua manera debe ser y mester a cambia esaki pa un competencia di Duathlon mirando cu e organisadonan a elimina e parti di landamento pa motibo di siguridad. No por a core e riesgo di laga e demas competidonan landa den un lama cu tabata demasiado bruto y peligroso. Tambe e factor di bientonan fuerte a hunga un rol. Esaki a haci cu e competencia a bira un di 3km core na pia reemplasando e landamento y despues recori 40km riba bicicleta y culmina cu 10km core na pia.

Mester bisa cu e competencia a cay un tiki den desbentaha pa atleta Arubano Renze Postma cu tambe a competi mirando cu e disciplina di landamento ta e parti mas fuerte di Postma. Den casi tur competencia cu e la participa na dje e la sali como un di e prome nan for di awa. No obstante esaki asina mes Renze a keda na di 20 overall den 35 competido. E factor di calor y un ruta super pisa cu hopi sero tambe a dificulta e careda riba bais pa Renze. Den su categoria cual ta e Sub 23, Renze a ocupa un di 9 luga den 17 participante