ORANJESTAD – Durante un presentacion extenso duna dialuna mainta pa personal di DOW den conferencia di gobierno, a bin dilanti e realidad duro di e planta di purificacion conoci como e Riool Water Zuiverings Instalatie, (RWZI), primordialmente esun Bubali. Loke a sali afo ta cu mester reemplaza esaki mas lihe cu ta possible, pero cu no tin fondo aworaki. Pesey e mandatario di medio ambiente a sigura cu ta trahando riba un asina yama ‘business case’ pa haya fondo pa crea e planta nobo.
BIEUW
E planta actual di Bubali tin un capacidad di procesa 4.500 mil cube di desperdicio, pero ta procesando double, na 8 mil casi. E ta esun mas bieu di e tres plantanan (uno tin na Parkietenbos y e otro na Zeewijk. E problema di e planta di Bubali ta cu si esaki daña, y rementa, e por crea un problema serio di medio ambiente, afectando nos turismo directamente mirando su localidad actual, cerca di e strip di hotel y Eagle Beach. E mandatario no a bisa pa ki tempo esaki lo mester por keda reemplasa. Loke a resalta ta cu a inverti algun miyon florin den e planta di Bubali, cu intencion di mengua e problemanan, y cu esaki mester por yuda pues, pero ta manera un pleister riba e herida.
ORANJESTAD – Presidente di Parlamento Edgard Vrolijk a programa e reunion solicita pa fraccion di RAIZ, pasobra e la wordo notifica pa parlamentario Guedez Erasmus, cu pa luna di april 2024, e reunionan di consulta riba e concepto di ley di matrimonio di mesun sexo ta termina. Asina e la informa Noticiacla.com diaranson anochi y a mustra e carta den cual e ta informa e fraccion RAIZ.
ORANJESTAD – Presidente di Parlamento Edgard Vrolijk a cumpli toch cu e peticion di partido RAIZ y a condece e reunion solicita riba tema di matrimonio di mesun sexo. Diaranson anochi laat, e partido RAIZ a confirma cu Vrolijk a confirma e fecha di 8 di mei 2024 unda Parlamento di Aruba lo haya oportunidad democratico pa vota riba e ley. No ta conoci si esey ta e motibo di e conferencia di prensa yama awe diaranson, pero ta mustra asina awor si. Esey ta nifica cu Vrolijk sea a baha cabez pa RAIZ, y concede e reunion toch, of cu mientrastanto e trabou di parlamentario Guedes a termina diripiente cu a pone cu awor si por yama e reunion.
ORANJESTAD – Deadline a pasa pa presidente di Parlamento (lesa: MEP). Awor palabra ta na fraccion di partido RAIZ. Diaranson 5’or di atardi, e ultimatum cu fraccion di partido RAIZ (lesa :Misha Raymond ) a pone pa presidente di Parlamento Edgard Vrolijk yama e reunion pa trata e ley di matrimonio di mesun sexo den Parlamento. E deadline a pasa, y nada no a sosode, manera cu por a spera. E prome pa reacciona, tabata lider di partido ACCION21, Miguel Mansur cu a pone riba su pagina di Facebook ‘Kico awor??” cu algun option. Mientrastanto atardi, e fraccion di RAIZ a yama un conferencia di prensa pa diahuebs 11’or di mainta cu e unico tema, ‘Matrimonio pa pareha di mesun sexo”.
ORANJESTAD - Minister Xiomara Maduro a informa cu entrante 1 di april 2024 e suma di exoneracion di impuesto riba ekipahe di biaheronan ta aumenta di AWG 400 pa AWG 900.
ORANJESTAD – E reunion di Parlamento cu parlamentario Miguel Mansur a pidi unda cu mester a ‘midi’ e sosten pa e presidente di Parlamento, manera por a sperra, no a wordo concedi. Envez di un reunion, Mansur a opta e ora pa tene un conferencia di prensa riba e mesun ora cu e la solicita e reunion, esta awe mainta 10’or. Durante e conferencia, e la referi e.o. na e incapacidad di e parlamentario Darlene Guedes, pa por presenta den Parlamento, y cu ta malo cu un persona asina tin e ‘poder’ riba e presidente di Parlamento. E la enfoca riba Guedes ya cu ta e persona ey ta e motibo cu ainda no a yama un reunion pa trata e tema di concepto di ley riba matrimonio di mesun sexo. Guedes ta lidera e comision cu ta trata e temanan social y bou di cual e ta conduciendo reunionan di consulta. Ainda Guedes lo no a termina su reunionan, pa cual Vrolijk no por a yama e reunion en cuestion. Segun Mansur, fraccion di Raiz mientrastanto a pidi e mesun presidente di Parlamento pa mas tarda yama e reunion en cuestion, otro siman diaranson. Mientrastanto, ora cu Noticiacla a pidi Vrolijk pa un reaccion pakico no a yama e reunion, su comentarionan breve tabata:” Mi no tin comentario”.
ORANJESTAD – Diahuebs anochi partijraad di MEP a dicidi despues di un reunion urgente, cu nan ta sostene presidente di Parlamento Edgard Vrolijk. Votadornan y campañadornan di MEP a pidi aclareacion di locual ta socediendo den Parlamento entre Presidente Edgard Vrolijk y Parlamentario Misha Raymond. Esaki debi cu nan no a aprecia e tono y acusacionnan cu e Parlamentario ta uza contra Vrolijk.